Эбээн Бытантай улууһа кыстыгы этэҥҥэ аһаран эрэр. Бүгүн улууска тутуу матырыйаалын тиэйбит онус массыына кэлэн сүөкэммититттэн улаханныын-кыралыын үөрбүттэр. Баатаҕай Алыытыгар 220 миэстэлээх таас оскуола тутуллан эрэр.
— Быйыл бу оскуола тутуутугар СӨ Судаарыстыбаннай Мунньаҕа (Ил Түмэн) 100 мөл солк. көрбүтэ. Онно эбии бүддьүөтү чопчулаан биэриигэ 90 мөл солкуобайы көрүҥ диэн Ил Түмэнтэн көрдөстүбүт. Оскуолабыт тутуута ыытыллан эрэриттэн сүргэбит көтөҕүллэн сылдьар. Барыта былаан быһыытынан бардаҕына, 2023 сыл балаҕан ыйын 1 күнүгэр икки этээстээх оскуолабыт үлэҕэ киириэхтээх. Бэдэрээтчит – “Бэксэк” тэрилтэ, Чурапчыттан кэлэн иккис сылын үтүө суобастаахтык үлэлииллэрин иһин махтанабыт.
Арҕаа дойдулар хааччахтааһыннарыгар да тохтоотоххо, ыраах сытар улуус аһынан-үөлүнэн тутайбатын курдук дьаһаныахтаахпыт. Онуоха биһиэхэ былырыын Дьарҕаалаахха, Кустуурга тымнытар установкалары аҕалан туруорбуппут көмөлөһүөҕэ. Бу — 20 т контейнердар. Онон бу нэһилиэктэргэ аҕалан контейнердарбытыгар эти уурдубут, олус абыраллаах тэрил эбит. Бу үтүө саҕалааһын Арктика министиэристибэтин бырагырааматыгар киирбит, онон хоту улуустар абыраныыһыбыт. Быһата, федеральнай былаанынан олоххо киирдэ. Кустуурга 2,5 т, Дьарҕаалаахха 2 т эти уурбуппут. Аны Саккырыырга аҕалыахпыт. Оччоҕуна инникитин чугастыы Усуйаанаттан, Булуҥтан үрүҥ балыгы аҕалан уган, дьоммутун-сэргэбитин хааччыйыа этибит, — диэн кэпсээтэ Эбээн Бытантай улууһун баһылыга Гаврил Горохов.
Онон Эбээн Бытантайдар кыахтара тиийэринэн хааччыммыттар.
Бэлэмнээтэ Женни Стрюкова
Хаартыска: Г.Горохов тиксэрдэ