Экология сылыгар араас ис хоһоонноох үлэ ыытыллар. Ордук оскуолаларга.
edersaas.ru
— Чурапчы улууһун Г.Д. Протодьяконов аатынан Алаҕар орто оскуолатыгар үөрэнэр оҕолордоох ыаллар Экология сылынан чыычаах уйатын оҥорон бэлэх ууннулар.
Ол курдук, хас биирдии төрөппүт оҕолорун кытта кимиэхэ да хатыламмат гына уустаан-ураннаан, араас матырыйаалы туһанан кыһаннылар.
Ыалтан биир чыычаах уйата ирдэммитэ. Инньэ гынан, үс оҕолоох ыалга хас биирдии оҕо тус бэйэтин кылаатын киллэрэн, киһи кэрэхсиир үлэтэ үгүс.
Чыычаах уйаларын ыйыыр үөрүүлээх түгэҥҥэ оҕолор төрөппүттэрин кытта бииргэ кэлэн кытыннылар.
Билигин үөрэнээччилэр бэйэлэрэ оҥорбут чыычаах уйаларын аттынан үөрэ-көтө ааһаллар, — диэн сонунун үллэстэр төрөппүт Екатерина Попова.
Буолумуна, төрөппүтү уонна оҕону сомоҕолуур күүс айылҕа буоллаҕа. Онтон чыычаах – айылҕа оҕото. Алаҕар оскуолатын иитэр үлэҕэ чаҕылхай үлэтин ис хоһооно бу тэрээһинтэн да арылхайдых көстөр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Мария Слепцова түһэриитэ.