Оскуола Саҥа дьылыгар дьиэттэн ас аҕалар, баататтан, маарылаттан маскараат тиктэр бобуллар
Аҕыйах хонуктааҕыта оскуола Саҥа дьылыгар оҕолор дьиэлэриттэн ас аҕалаллара бобуллар үһү диэни истэн, Дьокуускай куорат уокругун дьаһалтатын үөрэххэ управлениетын саайтыгар киирэн, туһааннаах бирикээстэри көрдөөтүм. Буллум.
edersaas.ru
Бастакытынан, Дьокуускай куорат уокуругун дьаһалтатын үөрэххэ управлениетын ахсынньы 13 күнүнээҕи “Дьокуускай куорат уокуругун муниципальнай үөрэҕин тэрилтэлэригэр Саҥа дьыллааҕы бырааһынньыктары ыытыыга аһы тэрийии хонтуруолун күүһүрдэр туһунан” 01-10/1070 №-дээх бирикээһигэр “Үөрэх тэрилтэтин остолобуойуттан, буфетыттан ураты сирдэргэ астаах, ону тэҥэ, үөрэх тэрилтэтин хааччыйбат сирдэртэн бородууктаны ылан маассабай тэрээһиннэри ыытары боборго” диэн суруллубут. Бирикээс СанПиН пууннарыгар олоҕуран толоруллубут. Онон үгүс кылаастар бырааһынньыктааҕы астарын оскуола остолобуойугар сакаастыыр буолбуттар.
Иккиһинэн, “Дьокуускай куорат уокуругун үөрэҕин тэрилтэлэригэр Саҥа дьыллааҕы тэрээһиннэри ыытыыга куттал суох буолуутун миэрэлэрин туһунан” ахсынньы 4 күнүнээҕи 01-10/1026 №-дээх бирикээһэ тахсыбыт. Бирикээскэ Саҥа дьыллааҕы кыраапыгы оҥорууттан саҕалаан, дьуһуурустубаҕа тиийэ суруллубут. Биир интэриэһинэйэ баар, 1.13 пуунунан “Маарылаттан уонна баататтан оҥоһуллубут маскарааттаах оҕолор уонна улахан дьон кэлэллэрин, бенгальскай уоту, петарданы уонна атын умайымтыа эттиги, харыйаны киэргэтэргэ целлулоиднай, атын дөбөҥнүк умайымтыа оонньуурдары, киэргэллэри туһанар бобуллар” диэн суруллубут. Атын өттүн төрөппүт билбэтэҕин да иһин, сэрэйэрэ биллэр. Оттон чопчу баататтан, маарылаттан маскараат тиктиэ суохтаахпыт диэни хас биирдии төрөппүт билэрин саарбахтыыбын. Оҕом бастаатын эрэ диэн туох баҕар матырыйаалтан маскараат тигэрэ, оҥороро чахчы. Инникитин, төрөппүттэр итини учуоттуохтарын наада эбит. Бэрэбиэркэлээн турдахтарына тугу аахсыаҥ баарай, бирикээс тахсыбыта диэхтэрэ.
Людмила ПОПОВА, “Саха сирэ” хаһыат, edersaas.ru