Оскуола итии аһылыга тоҕо барыларыгар тэҥ буолбатаҕый?

Ааптар: 
Бөлөххө киир:

СӨ Бырабыыталыстыбатын отчуотун кэмигэр, икки алын кылааска үөрэнэр оҕолоох ийэ төлөпүөннээн алын кылаас оҕолоругар итии аһылык тоҕо араастаһарын ыйытта.

edersaas.ru

Тустаах ыйытыыга СӨ Бырабыыталыстыбатын бэрэссэдээтэлэ Сергей Местников: “Чахчы, оскуола аһылыгын боппуруоһа сүрүн тиэмэлэртэн биирдэстэринэн буолар. Былырыын дойду бэрэсидьиэнин быһаарыытынан, алын кылаас үөрэнээччилэрэ бары босхо итии аһылыгынан хааччыллыбыттара. Үбүлээһини федеральнай хааһынаттан ылабыт. Былырыын Саха сиригэр 500 мөлүйүөн солкуобай курдук суума көрүллүбүтэ, быйыл 1 миллиард солкуобай курдук буолар.

Бары да буолбатар, оскуола аһылыгын кэмбинээттэрин улахан аҥаардарыгар олохтоох оҥорон таһаарааччылар бородууксуйаларын туһанар, оҕолорбутун хаачыстыбалаах аһылыгынан аһатар соруктаахпыт”, — диэн хоруйдаата.

СӨ үөрэҕин уонна наукатын миниистирэ Михаил Сивцев: “Итии аһылыгынан хааччыйыыга Роспотребнадзоры кытта сүбэлэһэн, меню хас даҕаны барыйаана оҥоһуллубута. Салгыы үөрэх тэрилтэтэ бэйэтэ бигэргэтэр. Убаастабыллаах төрөпүттэр, эһиги бородуукта хаачыстыбатын көрөр уонна меню хамыыһыйатыгар киириэххитин сөп. Министиэристибэ иһинэн бэйэбит оҕолор итии аһылыктарын кэтээн көрөр оробуочай бөлөҕү тэрийбит. Өскөтүн туох эрэ сөпсөспөт түгэннээх буоллаххытына быһаччы биһигиттэн ыйыталаһыаххытын сөп”, — диэн быһаарда.

Ону тэҥэ, быйылгыттан “Аһаҕас министиэристибэ” диэн бырайыагы олоххо киллэрэн эрэллэрин кэпсээтэ. Манна министиэристибэттэн, министиэристибэ иһинэн үлэлиир тэрилтэлэртэн эппиэттээх дьон сыһыарыллыахтарын, олор быһаччы төрөппүттэр, үөрэнээччилэр ыйытыыларыгар хоруйдуохтарын, ол түмүгэр уопсай сүбэнэн быһаарыы ылыныллыаҕын иһитиннэрдэ.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0