Оскуола оҕото хас кыраадыс тымныыга үөрэнэ барыа суохтааҕый?

Дьэ кыһыммыт баарын биллэрэн, тымныытынан хаарыйан эрэр.  Аһара тымныйдаҕына, оскуола оҕолоро үөрэнэ барбакка, ыраахтан олорон үөрэниэхтэрэ. 

Дьокуускайдааҕы үөрэх управлениета  хас кыраадыска оҕолор ыраахтан олорон үөрэниэхтээхтэрин быһааран биэрдэ. Ол маннык. 1-5 кылаас үөрэнээччилэрэ 45 кыраадыс тымныы уонна  тыала суох, 44 кыраадыс тымныы эрээри, сөкүүндэҕэ 1 миэтэрэттэн  түргэн тыаллаах-куустаах, 43 кыраадыс тымныы уонна  сөкүүндэҕэ 2 миэтэрэттэн түргэн тыаллаах уонна 42 кыраадыс тымныы эрээри, 3-5 миэтэрэттэн түргэн тыаллаах буоллаҕына, оҕолор  дьиэлэригэр  ыраахтан олорон үөрэххэ көһөллөр.

Ону тэҥэ, 48 кыраадыс тымныы уонна тыала суох буоллаҕына, 1-8 кылаас үөрэнээччилэрэ оскуолаҕа барбаттар. Өскөтүн 47  кыраадыс тымныыга уонна 1 сөкүүндэҕэ  миэтэрэ түргэн тыаллаах буоллаҕына, оҕолор  дьиэлэригэр олоруохтаахтар.  46 кыраадыс тымныы эрээри, сөкүүндэҕэ 2 миэтэрэттэн түргэн тыаллаах, ону тэҥэ, 45 кыраадыс тымныы уонна сөкүүндэҕэ 3-5 миэтэрэ түргэн тыаллаах буоллаҕына,  эмиэ дьиэлэриттэн быгыа суохтаахтар.

Оттон 50 кыраадыс тымныы уонна тыала-кууһа суох буоллаҕына, бары кылаас оҕолоро  оскуолаҕа үөрэнэ кэлбэттэр. Ону тэҥэ, 49  кыраадыс тымныы эрээри, сөкүүндэҕэ 1 миэтэрэттэн түргэн тыаллаах, 48  кыраадыс тымныы уонна   сөкүүндэҕэ 2 миэтэрэттэн түргэн тыаллаах, салгыы 47 кыраадыс  тымныы эрээри, сөкүүндэҕэ 3-5 миэтэрэ түргэн тыаллаах буоллаҕына, бары кылаас үөрэнээччилэрэ дьиэлэригэр олоруохтаахтар.

Мантан инньэ  Саха сиринээҕи гидрометкиин ыстаансыйаларын  сарсыарда 6 чаастааҕы көрдөрүүлэрин туругунан  оскуолаларга “актированнай” күн буолара-буолбата быһаарыллыаҕа.