Сүрүн

Оскуола оҕолоро дьиэлэриттэн олорон үөрэниэхтэрэ

Тохсунньу 18 күнүттэн 9,11 кылаастартан ураты барыларын дьиэттэн олорон үөрэниигэ ыыттылар.

Эпидемиологическэй балаһыанньа уустугуран, СӨ Аҕа баһылыгын сорудаҕынан, 1-8 кылаастарга диэри уонна 10-с кылаас үөрэнээччилэрин барыларын дьиэттэн олорон үөрэнэргэ дьаһал ылылынна. Маныаха, оскуолаҕа үөрэнэр саастаах оҕолоох төрөппүт дьиэттэн олорон үлэлииригэр быраап биэрдэ. Маннык ис хоһоонноох соругу бэҕэһээ, тохсунньу 17 күнүгэр, эрэгийиэннээҕи суһал ыстаап сугулааныгар ылыммыттара.

Ил Дархан Айсен Николаев бэлиэтииринэн, Саха сирэ коронавирус дьаҥын төрдүс долгунугар киирбит. Улахан хонтуруолу оҕолор доруобуйаларыгар уурарга эттэ. Ол курдук, уһуйааннарга оҕолор кыраадыстарын күҥҥэ иккитэ бэрэбиэркэлиир буолуохтара. Ил Дархан бэлиэтииринэн, «омикрон» дьаҥа ОРВИ сибикилэригэр майгынныыр. Ол эрээри бу дьаҥ салгыы киһи доруобуйатыгар дьайыыта араас охсуулаах буолуон сөп. Онон кирииптээтим эбэтэр тымныйдым дии санаабыт дьон суһаллык быраастарга көрдөрөллөрүгэр сүбэлээтэ. Омикрон инкубационнай кэмэ 2-3 эрэ хонук, онон коронаирус дьаҥын быһаарар түргэн тестэри оҥорууга соруктары туруорда. Ол иһигэр түргэн экспресс-тестэринэн ыраах тайаан сытар хоту улуустары хааччыйарга сорудахтаата. Бу саҥа көрүҥ дьаҥҥа үксүн вакцина ылбатах дьон хаптараллар диэн этиллэр. Онон вакцина туруоруутун уонна ревакцинацияны күүһүрдэргэ сорудахтанна. Тэрилтэ салайааччыларыгар үлэһиттэри төһө кыалларынан дьиэттэн олорон үлэлииллэригэр, оттон дьиэттэн үлэлээбэт тэрилтэ үлэһиттэригэр тест оҥотторор туһунан эттэ. Бүгүҥҥү күнтэн чааһынай килииникэлэр дьаҥ саҥа көрүҥэр тас дойдуттан уонна уопсайынан, уоппускаттан тахсааччыларга босхо түргэн-тестэри оҥоруохтара. Маны таһынан, Ил Дархан култуура уонна успуорт тэрээһиннэрин бары ирдэбили тутуһан ыытарга дьаһайда. Оптуобустарга, элбэх дьон тоҕуоруһар сирдэригэр дезинфекция үлэтин күннэтэ ыытыы уонна мааскалаах сылдьыы эрэсиимин күүһүрдүүгэ эттэ.

Ульяна ЗАХАРОВА.

0
0
Telegram @edersaas20