Санаторнай оскуола-интэринээт үөрэнээччилэрэ «А зори здесь тихие…» сэһэнинэн видеокиинэ уһуллулар.
Хаҥалас улууһун Тиит Эбэ сэлиэнньэтигэр I — Дьөппөн санаторнай оскуола-интэринээтин 9 кылааһын үөрэнээччилэрэ Борис Васильев «А зори здесь тихие…» сэһэнинэн видеокиинэ уһуллулар. Сэһэҥҥэ Аҕа дойду уоттаах сэриитигэр кыттыбыт биэс хорсун кыыс уонна кинилэр командирдарын туһунан кэпсэнэр.
Нуучча тылын уонна литературатын учуутала бэлиэтээбитинэн, интэринээт иитээччитэ Наталья Яковлева этии киллэрбитин, «New Касл» оҕо хамсааһынын салайар Сардаана Борисова уонна үөрэнээччилэр тута сэргээн, сэҥээрэн, киинэни устар туһунан санааны олоххо киллэрэргэ көхтөөхтүк ылсыбыттар.
«Килиип да диэххэ сөп. «Любэ» бөлөх ырыатынан арыалланар. Оҕолор наһаа боччумнаахтык, дьоһуннук сыһыаннаһан кытыннылар. Алта мүнүүтэ иһигэр хорсун-хоодуот зенитчица кыргыттары уонна кинилэр хамандыырдарын көрдөрөргө кыһалынныбыт. Биир күн уһуллубут. Үүнэр көлүөнэҕэ, оҕолорго уоттаах сэрии туһунан дьиҥ кырдьык кэпсэниллиэхтээх уонна сэрии хаһан да буолбатын туһугар турунуохтаахпыт, эйэлээх олоххо дьулуһуохтаахпыт», — диэн Сардаана Борисова эттэ.
Хамандыыр Федот Васков оруолун Сережа Алексеев толорбут. Маша Иванова, Саина Прокопьева, Карина Павлова, Вероника Арсеньева уонна Айыылаана Христофорова зенитчица кыргыттар Маргарита Осянина, Соня Гурвич, Лиза Бричкина, Галина Четвертак уонна Евгения Комелькова оруолларын толорбуттар. Маны сэргэ Андрей Исаков уонна Денис Терехов оонньообуттар. Оҕолор бары 9 кылааска үөрэнэллэр, эксээмэннэрин туттарарга бэлэмнэнэллэр. Видеоны оройуон дьаһалтатын официальнай страницатыгар инстаграмҥа @novostihangalas көрүөххүтүн сөп.
+1
+1
+1
+1
+1
+1
+1