Оскуола оҕолоро – сынньалаҥҥа, устудьуоннар – дистанционнай үөрэххэ
Коронавируһунан сибээстээн, Саха сирин бары үөрэнээччилэрэ бүгүҥҥүттэн сааскы сынньалаҥҥа бардылар. Ити туһунан, СӨ Үөрэҕин уонна наукатын миниистирин бирикээһэ таҕыста.
Ил Дархан Айсен Николаев ыйааҕыгар олоҕуран, СӨ Үөрэҕин уонна наукатын миниистирэ Владимир Егоров коронавирус ыарыыны тарҕаппат туһугар бирикээһэ таҕыста. Тустаах бирикээскэ олоҕуран, бастатан туран, оскуола алын, орто, улахан сүһүөх үөрэнээччилэрин кулун тутар 18-27 күннэригэр сааскы сынньалаҥҥа ыытар, салгыы дистанционнай технологиянан (кыаллар буоллаҕына) эбэтэр биирдиилээн (индивидуальная программа) үөрэтэргэ эттэ.
Иккиһинэн, анал үөрэх тэрилтэлэрин устудьуоннарын кулун тутар 18 күнүттэн электроннай, дистанционнай технологиянан, биирдиилээн үөрэтэргэ диэн иһитиннэрдэ.
Үсүһүнэн, элбэх оҕо, устудьуон мустар сиригэр уонна устудьуоннар, үөрэнээччилэр уопсайга, интэринээккэ маассабайдык мустубаттарын туһугар миэрэ ыларга, кыаллар буоллаҕына олорор сирдэринэн ыыталыырга эттэ.
Төрдүһүнэн, кулун тутар 18 күнүттэн эбии үөрэхтээһин дьарыктарын тохтоторго ыйда.
Ити бирикээс оскуолаларга, орто анал үөрэх тэрилтэлэригэр сыһыаннаах. Оттон уһуйааннар урукку эрэсиимнэринэн үлэлииллэр. Дезинфекция уонна сэрэтии үлэтэ күүскэ барар диэн бэлиэтииллэр.
Людмила ПОПОВА, edersaas.ru