Биһиги өрөспүүбүлүкэбитигэр экологическай иитии оскуолаттан, оҕо саадыттан, дьиэ кэргэнтэн саҕалаан ыытыллар, хас улуус ахсын оскуолатааҕы лесничестволар, айылҕа эдэр доҕотторун түмсүүлэрэ үлэлиир.
От ыйын 5 күнүгэр Хаҥалас улууһун Күөрдэмигэр, II Дьөппөн орто оскуолатын базатыгар оскуола лесничестволарын салайааччыларын III өрөспүүбүлүкэтээҕи сэминээрдэрэ буолан ааста. Бу дьоһун дьаһалы Экология, айылҕаны туһаныы уонна ойуур хаһаайыстыбатын министиэристистибэтэ итиэннэ “Эйгэ” экологическай үөрэхтээһин киинин, Саха сирин лесоводтарын уопсастыбатын өйөбүллэринэн, «Сахаагроэкотур национальнай үөрэтэр киин» диэн эбии үөрэхтээһин судаарыстыбаннай аптаныамынай тэрилтэтэ тэрийэн ыыттылар.
Сэминээргэ Хаҥалас, Муома, Таатта, Чурапчы, Өлүөхүмэ улуустарыттан уонна Дьокуускай куораттан оскуолалар лесничестволарын салайааччылар итиэннэ ойуур эйгэтин үлэһиттэрэ бэйэлэрин үлэлэрин-хамнастарын билиһиннэрдилэр, уопут атастастылар.
Хаҥалас улууһун оскуолаларын “Харысхал” лесничествота Туруук Хайаҕа 60 гектар иэннээх ойуур учаастагын босхо туһанарга сыһыартаран, ыраастаабыт, билигин экологическай ыллыктары оҥорорго үлэлии сылдьар эбит. Сэминээр кыттыылаахтара Туруук Хайа сирин-уотун үөрэтэн бараннар, экологическай хайысхалаах туризмы тэрийиигэ бэйэлэрин көрүүлэрин үллэһиннилэр итиэннэ кэлин олоххо киллэриэххэ сөптөөх экологическай ыллыктар бырайыактарын оҥорон көмүскээтилэр. Түмүккэ ойууру туһаныы, чуолаан бырайыактарынан үлэ докумуоннарын оҥоруу, буор-кумах ылыллыбыт каръердардарын итиэннэ умайбыт учаастактары чөлүгэр түһэрии үлэтин хайдах тэрийэр туһунан санаа атастастылар. Оскуола лесничестволарын өрөспүүбүлүкэтээҕи сүлүөттэрин тэрийэргэ этии киллэрдилэр.
Раиса Сибирякова, «Саха сирэ» хаһыат, edersaas.ru.