Оскуола иннинээҕи үөрэхтээһин 100 сылыгар аналлаах кэмпириэнсийэ буолла
Быйыл Саха сиригэр оскуола иннинээҕи үөрэхтээһин тэриллибитэ 100 сыла. Бэлиэ тэрээһин иитинэн “Качество дошкольного образования – стратегический ресурс будущего” диэн норуоттар икки ардыларынааҕы кыттааччылардаах научнай-практическай кэмпириэнсийэ буолан ааста.
Тэрээһин ыраахтан олорон ыытыллыбыт буолан, өрөспүүбүлүкэ бары муннуктарыттан 400-тэн тахса педагог кытынна диэн бэлиэтииллэр. Кэмпириэнсийэ Иикки күн устата хас даҕаны сиэксийэнэн үлэлээтэ. Арассыыйаттан 30, тас дойдуттан 8 биллэр-көстөр, ааттаах-суоллаах учуонай, исписэлиис, педагог Великобританияттан, АХШ-ттан, Казахстантан, Бурятияттан, Алтайтан, о.д.а. дойдулартан, эрэгийиэннэртэн тиийэ дакылаат аахтылар, бэйэлэрин санааларын эттилэр.
Тэрээһиҥҥэ оскуола иннинээҕи үөрэхтээһин сайдыытыгар сыһыаннаах, суолталаах боппуруостары кэпсэттилэр. Ол курдук, оҕону кыра сааһыттан иитии, үөрэтии, экологическай үөрэхтээһин, аныгы уһуйааннары салайыы.
Күн бүгүн үлэлии сылдьар иитээччилэр, кэмпириэнсийэҕэ кыттыбыт төрөппүттэр элбэҕи биллилэр, санааларын атастастылар, туохха болҕомто уурар наадатын көрдүлэр.
Санатан эттэххэ, СӨ Үөрэҕин уонна наукатын министиэристибэтэ иһитиннэрэринэн, күн бүгүн Саха сиригэр 809 оскуола иннинээҕи тэрилтэҕэ, уопсайа, 73 тыһыынчаттан тахса оҕо сылдьар, 8157 киһи үлэлиир.
СӨ оскуола иннинээҕи үөрэхтээһин 100 сылын көрсө, көһө сылдьар кубогы улуустарынан ыытыы үөрэх үлэһиттэрин Тохсунньутааҕы мунньаҕыттан саҕаламмыта.
Людмила ПОПОВА, “Саха сирэ” хаһыат, edersaas.ru