Нам улууһун Партизан нэһилиэгин орто оскуолатыгар Бизнес-инкубатор тэриллэн, иккис сылын үлэлиир.
edersaas.ru
Оҕолор бэйэлэрин оҥоһуктарын атыылаан, харчыны-үбү сатаан туттарга үөрэнэллэр. Асчыт күнүгэр анаан «Илиҥҥи баһаар» («Восточный базар») диэн ааттаан, иккис сылларын ас астаан атыылыыллар.
Тэрээһини эдэр педагогтар — оскуола дириэктэрэ Александр Гуляев уонна кинини иитэр үлэҕэ солбуйааччы Константин Колодезников көҕүлээн ыыталлар. Маны таһынан, оскуолабытыгар Нам улууһун төрүттээбит Мыымах оҕонньор аатын ылыммыт «Мыымах сиэннэрэ» оҕо уопсастыбаннай тэрилтэтэ олус бэркэ үлэлиир. «Мыымахтары» учуутал Нария Романова салайар. Оҕолор Аҕам саастаах дьон күннэригэр Гериатрическай кииҥҥэ тиийэн кырдьаҕас дьоҥҥо кэнсиэр көрдөрөн кэлбиттэрэ.
«Илиҥҥи баһаарга» Ийэ күнүгэр анаан оскуола оҕолоро ийэлэригэр анаан олус үчүгэй кэнсиэри бэлэх ууннулар.
Ити курдук, оскуолабытыгар сэргэх тэрээһиннэр ыытыллар буолан, төрөппүттэр эмиэ көхтөөхтүк кытталлар.
Полина СКРЯБИНА,
Нам улууһа.