Оскуола бастыҥ остолобуойун быһаарар куонкуруһу биллэрдилэр
Дойду Үөрэҕириигэ министиэристибэтэ “Оскуола бастыҥ остолобуойа” Бүтүн Арассыыйатааҕы куонкуруһу биллэрдэ.
Санатан эттэххэ, былырыыҥҥыттан дойду бэрэсидьиэнэ Владимир Путин сорудаҕынан алын кылаас үөрэнээччилэрэ (1-4 кылаастар) босхо аһыыллар. Маныаха анаан дойду хааһынатыттан үгүөрү үп көрүллэр. Онон оскуола остолуобуойун үлэтин, аһылыгын хаачыстыбатын тупсарар инниттэн тустаах куонкуруһу тэрийэллэр.
Куонкурус үс таһымынан ыытыллар: улуустааҕы (алтынньы 11-20 күннэрэ), эрэгийиэннээҕи (алтынньы 21 – сэтинньи 5 күннэрэ) уонна федеральнай (сэтинньи 8 – ахсынньы 1 күннэрэ). Күрэскэ ханнык баҕарар оскуола, үлэһит кыттыан сөп, сааһынан, үлэлээбит ыстааһынан хааччах суох. Кыттааччылары анал идэлээх дьонтон түмүллүбүт хамыыһыйа сыаналыаҕа.
Былырыын өрөспүүбүлүкэ таһымнаах куонкуруска Дьокуускай куорат М.И. Кершенгольц аатынан 9-с нүөмэрдээх уонна Эдьигээн орто оскуолата бастаабыттара.
Людмила ПОПОВА, “Саха сирэ” хаһыат, edersaas.ru
Хаартыска: СИА.