Уһук Илиҥҥэ боломуочуйалаах бэрэстэбиитэл Юрий Трутнев этиитинэн, Арассыыйа үөрэнээччилэригэр оскуолаҕа “Омега-3” эбилиги биэрэр буолуохтарын сөп. Камчаткаҕа номнуо 32 тыһыынча үөрэнээччи бу туһалаах эбилиги иһэр эбит.
Бу күһүҥҥүттэн Камчаткаҕа “Растем здоровыми” бырагыраама үлэлиир. Тымлатскай балык собуота “Омега-3” туһалаах эбилигин оҥорон таһааран, төрөппүттэр көҥүллээһиннэринэн, оҕолорго иһэрдэллэр. Оҕо доруобуйатыгар чахчы үтүө дьайыылаах диэн төрөппүттэр бэлиэтииллэр. Мээнэҕэ да, сэбиэскэй кэмҥэ эмиэ оҕолорго балык сыатын иһэрдибэт этилэр ээ.
Юрий Трутнев бу көҕүлээһинин РФ бырамыысыланнаска, эргиэҥҥэ миниистирэ Денис Мантуров өйөөтө. Аны исписэлиистэр оҕо доруобуйатыгар туох туһалааҕын, көдьүүстээҕин, ороскуотун ааҕан-суоттаан биэрэллэрэ ирдэнэр.
Камчатка уопутун бырабыыталыстыба таһымыгар өйөөтөхтөрүнэ, Юрий Трутнев үөрэҕирии министиэристибэтин кытары кэпсэтэн, Уһук Илиннээҕи балык сыатын Арассыыйа бары үөрэнээччилэрэ иһэр буолуохтара. Ону тэҥэ, Уһук Илин оҥорон таһаарааччыларыгар эмиэ өйөбүл буоллаҕа.
Ангелина Васильева, “Саха сирэ” хаһыат, edersaas.ru
Хаартыска: СИА.