Горнай улууһугар Степан Гурьевич Ковров аатынан Күөрэлээх орто оскуолатыгар дьоһун хардыы оҥоһулунна. Өр кэмҥэ толкуйдаммыт ыра санаабыт туолар дьоро түгэнэ, мэдиссиинэ кылааһын аһыллыыта буолла.
Маннык санаа хаһан, хайдах киирбитин, туох сыаллаах-соруктаах кылаас арыллыбытын туһунан кылгастык сырдатар буоллахха, бу бырайыакпытын ааспыт сылга толкуйдаан, улуустааҕы үөрэх управлениетын хамыыһыйатыгар көмүскээн, ХИФУ мэдиссиинэҕэ институтун мэдиссиинэ аччыгый академиятын филиала буолан, улуустааҕы киин балыыһаны кытта дуогабардаһан, араас бырайыактарга кыттан үлэбитин саҕалаатыбыт. Бырайыак сыала-соруга оскуолабыт 7-с кылааһын үөрэнээччилэригэр анаан, идэни талыах иннинээҕи үөрэхтээһиҥҥэ (предпрофильнай) мэдиссиинэҕэ хайысханы күүһүрдүүгэ маннык кылааһы арыйыы буолар. Медик үлэтэ киһи доруобуйатын чэбдигирдэрин таһынан, олоҕун уһатарга, харыстыырга сыал-сорук туруоран сыралаһара туохтааҕар да суолталанна. Пандемия кэмигэр судаарыстыба сүрүн баайынан хас биирдии киһи олоҕо буолар диэн дойду бэрэсидьиэнэ Владимир Путин Арассыыйаҕа, Ил Дархан Айсен Николаев өрөспүүбүлүкэҕэ бу хайысхаҕа үлэ хаачыстыбатын тупсарыыны, каадыр боппуруоһун быһаарыыны инники күөҥҥэ туруордулар. Онон бу хайысханы таба тайаммыппыт оруннах дии саныыбыт.
Кылааһы арыйыы үөрүүлээх түгэнигэр мэдиссиинэ аччыгый академиятын (ММА) салайар биология наукатын кандидата, ХИФУ мэдиссиинэҕэ институтун фармакологияҕа уонна фармацияҕа кафедратын доцена, СӨ доруобуйа харыстабылын туйгуна Ирина Малогулова, улуустааҕы үөрэх управлениетын начаалынньыга Варвара Сметанина, улуустааҕы киин балыыһа кылаабынай бырааһа Леонид Апросимов, Октябрьскай нэһилиэк баһылыгын солбуйааччы Прасковья Абрамова, төрөппүттэр кэмитиэттэрин бэрэссэдээтэлэ, «Айылгы» оҕо уһуйаанын сэбиэдиссэйэ Мария Яковлева ыалдьыттаатылар, эҕэрдэлэрин, алгыс тылларын, сүбэлэрин оҕолорго эттилэр.
Салайааччыларга бырайыак үлэтэ саҕаланарыгар күүс-көмө буолбуттарыгар махтанабыт.
Оскуола кэлэктиибэ,
Күөрэлээх, Горнай.