Муус устар 6 күнүттэн өрөспүүбүлүкэ оскуолалара дистанционнай технологиянан үөрэнэ олороллор.
Ньурба улууһун элбэх оҕолоох ыалларын оҕолоро дистанционнай үөрэх кэмигэр эбии аһылыгынан хааччылыннылар. Ол курдук, оскуолаҕа итии аһылыгынан хааччылла сылдьыбыт элбэх оҕолоох уонна кыаммат ыалларга эбии аһылык түҥэтилиннэ.
Бу туһунан Ньурба улууһун салалтатын пресс-сулууспата маннык иһитиннэрдэ:
— Улуус баһылыгын кулун тутар 30 күнүнээҕи 448 №-дээх «Муниципальнай үөрэх тэрилтэлэрин үөрэнээччилэрин аһылыгынан хааччыйыы туһунан» дьаһалыгар олоҕуран, муус устар 8 күнүттэн оскуолаҕа үөрэнэр оҕолоох ыалларга эбии аһылык түҥэтилиннэ. Роспотребнадзор ирдэбилинэн өр кэмҥэ буорту буолбат аһылык эрэ маннык түҥэтиллэр буолан, “сухой паек” оҥоһулунна. Манна сок, курууппа, мокоруон, мас арыыта, мэлии саахар, кондитерскай оҥоһуктар (бэчиэнньэ, баахыла, кекс), сгущенка уонна кэнсиэрбэ киирэллэр. Үөрэх күнүгэр биир оҕоҕо 80 солкуобай суумалаах аһылык тиксиэхтээх. Оҕолорго «сухой паегу» күн аайы таһа сылдьыбат курдук, нэдиэлэтээҕи ас биирдэ тиксэрилиннэ. Ньурбатааҕы техлицей, Араҥастаах, Маар оскуолалара оҕолорго икки нэдиэлэтээҕи астарын биэрдилэр. Улуус үрдүнэн маннык аһылыгынан 2 222 оҕо хааччыллыахтаах. Төрөппүттэр маннык тэрээһини биһирээтилэр. Бу үлэ дистанционнай үөрэх кэмин устата ыытыллыаҕа. Үөрэх тэрилтэлэригэр сөптөөх үп-харчы улуус бүддьүөтүттэн көрүллэн турар.
Нюргуйаана Иванова, “Саха сирэ” хаһыат, edersaas.ru
Хаартыскалар — Ньурба улууһун дьаһалтатын пресс-сулууспатыттан.