Уопсастыба

Оччоҕо оскуола туохха үөрэтэрий?



Дэриэбинэҕэ тахсан ыраас салгынынан тыына түһэн баран, аҕыйах хонуктааҕыта төттөрү киирдим. Былыргы баартыйалаах, быыбартан матарым табыллыбат.

edersaas.ru

Быыбардыы сылдьан, өрүү көрүстүбүт да ыаһахтаһар ыалым эмээхсини көрүстүм. Бы кыһын, сиэним оскуоланы бүтэрээри сылдьар диэн үөрэ-көтө кэпсээбитэ. Бу сырыыга санаата букатын түспүт, сиэнэ босхо үрдүк үөрэххэ кыайан киирбэккэ, төлөбүрдээххэ киллэрбиттэр. Сылга барбах 200 тыһ. солк. үһү! Ийэлээх аҕата кыра хамнаска үлэлииллэрин уруккуттан истэбин, эбиитин элбэх оҕолоохтор. Дьэ хайдах уйунаахтыыллар диэн эмээхсин санааҕа баттата сылдьар.

Биһиги даҕаны онтон ордумаары гынныбыт дуу, быыбардаан киирээппитин кытта, кыыспыт кэллэ. Аны эһиил мин сиэним оскуоланы бүтэрэр. Кыыһым ийэтигэр үчүгэй эрэпэтиитэр наада диирин истэн туоһулаһааччы буоллум. Онуоха: “Аҕаа, билигин үрдүк үөрэххэ киирэргэ биир кэлим эксээмэҥҥэ букатын үрдүк баалы ылар ирдэнэр. Ол инниттэн олох үчүгэйдик бэлэмниир эрэпэтиитэр наада. Онто суох босхо миэстэҕэ суоттанан да туһа суох”, — диэн быһаарда. Ол төлөөн үөрэттэрбитиҥ кэннэ букатын даҕаны бахалаабыр эрэ диэнин бүтэрэр үһү. Дьэ, саҥа олох диэтэҕиҥ!

Былыр биһиги саҕана үчүгэй да эбит. Кэпиэйкэтэ суох оскуоланы бүтэрэрбит. Киһи барыта үөрэхтэнэн, орто да буоллар идэ ыларга талаһара. Үрдүк үөрэҕи үгүстэр ыра санаа курдук ыйдаҥардан көрөллөрө. Билигин оннук үйэ кэллэ дуу… Үптээх-харчылаах эрэ ыал оҕото үөрэнэр кыахтанна. Атыттар орто үөрэхтэри “бултаһарга” эбэтэр баҕалаах үрдүк үөрэхтэригэр сылга ботуччу харчыны төлөөн үөрэнэргэ күһэллэллэр. Кыыһым этэринэн, сыллата босхо үөрэх миэстэтин көҕүрэтэн иһэллэр үһү. Ол иһин куонкурус олус үрдүк, эрэпэтиитэрдэннэххэ эрэ сатаныыһы диир. Аны ол эрэпэтиитэрбит биир чаас үөрэтэрэ ортотунан 700 солк. үһү! Дьэ сыана диэтэҕиҥ. Нэдиэлэҕэ хас күн үөрэнэрий диэн ыйыппыппар, кырата үс-түөрт күн диэн соһутан өлөрө сыста. “Бэйи, тохтоо, орто да үөрэх кэннэ үрдэтинээ ини”, — диэн этэн көрдүм да, букатын истибэт. Оннооҕор араас гимназия, лиссиэй оҕолоро “4”, “5” сыанаҕа туттаралларын биллэллэр да, син биир эрэпэтиитэрдэнэллэр диир. Ону ааһан, сорох кылаастарга бэрэбиэркэлиир үлэни ыыталлар, онно эмиэ туспа эрэпэтиитэрдэр үөрэтэллэр үһү.  Оҕо барыта харчы төлүү-төлүү эбии үөрэнэр буоллаҕына, оскуола туохха үөрэтэрий?! Ол иһин дьиэ аанын аайы “Эрэпэтиитэр өҥөтө” диэн биллэрии ыйыыллар эбит дии, хантан килиэптэнэллэрин билэн эрдэхтэрэ.

Һэ-һэ-һэ, киһи да күлэр, мин аныаха диэри мас-таас курдук оскуола билиини иҥэриэхтээх, төрөппүт иитиини биэриэхтээх диэн өйдөбүллээх этим. Ол эксээмэннэрин кыайан туттарбат оҕолору бэлэмниир оскуола туохха нааданый?! Ол да иһин тохсус кылаас кэнниттэн орто үөрэххэ барыы элбэх!

«Саха сирэ» хаһыакка, edersaas.ru саайтка анаан Биэтэс БИЛЭЭХЭП. 

0
1

Добавить комментарий