Оскуола, уһуйаан улахан аҥаардара олоҕурбут көрүҥүнэн үлэлииллэр
Бэҕэһээ СӨ үөрэҕин уонна наукатын миниистирэ Михаил Сивцев социальнай ситимнэринэн быһа сибээскэ тахсан, ыйытыыларга хоруйдаата.
edersaas.ru
“Дойду үрдүнэн үөрэҕи олоҕурбут көрүҥүнэн (очно) ыытарга сүбэлээбиттэрэ. Күн бүгүн Саха сиринээҕи оскуолалар 80-тан тахса бырыһыанын үөрэнээччитэ оскуолаҕа миэстэтигэр тиийэн үөрэнэр, дьарыктанар. Биһиэхэ, уопсайа, 649 оскуола баар.
Өрөспүүбүлүкэ уһуйаанын улахан аҥаара олоҕурбут көрүҥүнэн (очно) үлэлии олорор. Эбии үөрэхтээһин дьарыктара алтынньы 1 күнүттэн саҕаланыахтара.
Орто анал үөрэх тэрилтэлэрин 23 тыһыынча үөрэнээччититтэн, 4-тан тахса бастакы куурус устудьуона олоҕурбут көрүҥүнэн (очно) үөрэнэр. Онтон атыттар — дистанционнай көрүҥүнэн. Бу барыта хамсык туругуттан тутулуктаах” – диэн СӨ үөрэҕин уонна наукатын миниистирэ иһитиннэрдэ. Сорох үөрэх кыһаларын тэрилтэрэ обсерватор быһыытынан үлэлииллэрин эттэ.
Людмила ПОПОВА, “Саха сирэ” хаһыат, edersaas.ru