Оскуола оҕолоро аҕаларын кытта сэрии сэбин оҥордулар (ВИДЕО)

Ааптар: 
Бөлөххө киир:

Чурапчы улууһун Дириҥ орто оскуолатын үөрэнээччилэрэ аҕаларын кытта Кыайыы 75 сылынан, кыайыыны аҕалбыт сэрии сэбин оҥордулар.

edersaas.ru

Дириҥ орто оскуолатын үлэ уруогун учуутала, СӨ үөрэҕириитин туйгуна, РФ үөрэҕириитин туйгуна Федор Марков: “Оружие победы” диэн быыстапка тэрийэбит, үлэлэргитин бэлэмнээҥ диэн эппиттэрэ. Оҕолор онно кыттаары оҥорон саҕалаабыттара. Онтон коронавируһунан сибээстээн, ыраахтан олорон (дистанционнай) үөрэххэ көспүттэрэ.

Оскуолабыт иһинэн “Аҕа уонна оҕо” диэн бырагыраама үлэлээбитэ быданнаата. Оҕолор иллэҥ бириэмэ көһүннэ даҕаны аҕаларын кытта мастарыскыайга киирэн уһаналлар. Матырыйаалларын аҕалан бэйэлэрэ уһаналлар, сороҕор көмөлөһөбүт. Онон саҕалаабыт үлэлэргитин ситэриҥ диэн “Аҕа уонна оҕо” диэн бырайыагынан быыстапкаҕа киллэрдибит. Дьиэлэригэр олорор кэмнэригэр аҕаларын кытта бэйэлэрэ оҥордулар. Биһиги туох тиийбэтинэн көмөлөһөн эрэ биэрдибит. Онон кыайыыга сирдээбит хас даҕаны сэрии сэбин бэлэмнээн таһаардылар», — диэн кэпсиир.

Ол курдук, Василий Титович Аммосов 8-с кылааска үөрэнэр уолун Васяны иһэрдиигэ үөрэтэ таарыйа, тимиртэн “Максим” бүлүмүөтү оҥорбуттар. Бу, үүт-үкчү дьиҥнээх бүлүмүөт курдук. Федор Трофимович этэринэн, оннооҕор кээмэйэ кытта сөп түбэһэр үһү. Интэриниэттэн көрөн, барытын сөп түбэһэр гына кээмэйдээн чочуйбуттар.

Өссө биир “Максим” бүлүмүөтү Леонид Леонидович Макаров 6-с кылааска үөрэнэр уолун Радигы кытта маһынан кыспыттар.

Онтон Константин Семенович уонна Филипп Наумовтар эмиэ тимиртэн ППШ аптамааты оҥорбуттар. Филипп 7-с кылаас үөрэнээччитэ.

Афанасий Семенович Олесов уолун Алешаны (6-с кылаас үөрэнээччитэ) кытта кыра “Катюша” макетын оҥорбуттар.

Онтон 7-с кылаас үөрэнээччитэ Кеша Кузьмин МП-40 аптамааты оҥорбут. Барытын бэйэтэ бэлэмнээбит, кыра итэҕэһин учууталлара көмөлөспүттэр. Дьиэтигэр илдьэн биэрбиттэрин силимнээн, кырааскалаан ситэрбит.

Аны кыргыттар көмөлөрө эмиэ сүҥкэн эбит. Ол курдук, ыраахтан кыыһан көстөр кыһыл таҥаһынан полотно тикпиттэр. Манна Хоптоҕо нэһилиэгиттэн Аҕа дойду Улуу сэриитигэр хас киһи кыттыбытын, онтон хас буойун төннүбүтүн, сэрии толоонугар хас саллаат охтубутун көрдөрөр. Инньэ гынан, быыстапка көстүүтүн өссө тупсарбыт.

Аныгы кэмҥэ төрөппүт оҕотугар быыс булан бириэмэ аныыра ахсааннаах. Үлэ уруогун учуутала Федор Трофимович Марков, маастар Альберт Анастасьевич Сергеев көмөлөрүнэн, аҕа оҕотун бэйэтин холобурунан иитэрин Хоптоҕо нэһилиэгин олохтоохторо көрдөрдүлэр. Кыайыы 75 сылынан бэртээхэй бэлэҕи оҥордулар.

Людмила ПОПОВА, edersaas.ru

+1
0
+1
0
+1
0
+1
0
+1
0
+1
0
+1
0