Мэҥэ Хаҥалас улууһугар олорор Осиповтар дьиэ кэргэн элбэх оҕолоох ыалларга туһуламмыт өрөспүүбүлүкэтээҕи бырагырааманан бэриллэр социальнай төлөбүр суотугар саҥа улахан дьиэ тутуннулар.
edersaas.ru
СӨ Тутууга министиэристибэтин пресс-сулууспата иһитиннэрбитинэн, Чүүйэ сэлиэнньэтин олохтоохторо — Осиповтар дьиэ кэргэн 2019 сыллаахха «Обеспечение жильем многодетных семей, имеющих 5 и более несовершеннолетних детей» өрөспүүбүлүкэтээҕи бырагырааманан олорор дьиэ туттарга анаан социальнай төлөбүрү ылбыттар. Төлөбүр суумата — 2 245 698 солкуобай.
— Түгэнинэн туһанан, СӨ бырабыыталыстыбатыгар маннык бырагыраама олохтообуттарын иһин итиэннэ бэрт кылгас кэм иһигэр дьиэбитин тутан биэрбит урбаанньыт Валерий Петровка махтанабыт, — диэн Осиповтар махталларын биллэрдилэр.
Санатан эттэххэ, «Обеспечение жильем многодетных семей, имеющих 5 и более несовершеннолетних детей» өрөспүүбүлүкэтээҕи бырагыраама 2012 сылтан үлэлиир. Ол гынан баран уһун кэмҥэ бүддьүөттэн үбүлээһин көрүллүбэккэ сылдьыбыта. 2018 сыллаахха ахсынньыга СӨ Ил Дархана Айсен Николаев сорудаҕынан бырагыраамаҕа үбүлээһин көрүллүүтэ сөргүтүллүбүтэ. Онон 2019 сылга социальнай төлөбүрүнэн 117 ыал туһаммыта. 2020 сылга өссө 116 ыал маннык төлөбүрү ылыаҕа.
edersaas.ru