Сарсыҥҥыттан Красноярскайга саҕаланар Иван Ярыгин кэриэһигэр көҥүл тустууга ХХХ норуоттар икки ардыларынааҕы турнирга Хотугу Осетия хамаандата толорута суох састаабынан кыттар. Бу туһунан Арассыыйа үтүөлээх тириэньэрэ Марик Тедеев “Осетия-Ирыстон” телехампаанньаҕа иһитиннэрдэ.
Хамаанда сүрүн тириэньэрэ Красноярскай көбүөрүгэр Чермен Валиев, Алан Засеев, Сослан Кцоев, Заур Сидаков, Владислав Валиев итиэннэ Батраз Цакулов тустуохтарын эттэ. Оттон Алан Хугаев уонна Артур Найфонов эчэйиилээхтэринэн, Сослан Рамонов эпэрээссийэ кэнниттэн чөлүгэр түһэринэн, оттон Хетаг Цаболов уонна Владислав Байцаев бу күннэргэ Индияҕа сылдьалларынан, быйылгы “Иван Ярыгин” Гран-при турниры көтүтэллэр диэтэ.
Бу иннинэ Арассыыйа сүүмэрдэммит хамаандатын сүрүн тириэньэрэ Дзамболат Тедеев “Новости” РИА-ҕа 2016 сыллааҕы Олимпийскай оонньуулар чөмпүйүөннэрэ Абдулрашид Садулаев “Иван Ярыгин” Гран-при турниртан босхоломмутун, билигин кулун тутар ыйга буолар аан дойду Кубогар итиэннэ муус устар ыйга ыытыллар Европа чөмпүйэнээтигэр кыттарга бэлэмнэнэрин туһунан иһитиннэрэн турар.
Санатар буоллахха, Иван Ярыгин кэриэһигэр көҥүл тустууга ХХХ норуоттар икки ардыларынааҕы турнир тохсунньу 24-27 күннэригэр Красноярскайга ыытыллар.
Роман Попов
Хаартыска Интэриниэттэн ылылынна.