“ОРВИ сибикитэ билиннэҕинэ, температуралаатаххытына суһал көмөнү ыҥырыҥ”
СӨ бырабыыталыстыбатын бэрэссэдээтэлин солбуйааччы Ольга Балабкина бүгүн коронавируһунан сибээстээн ыыппыт брифинигэр, ОРВИ сибикитэ баар, температура тахсар буоллаҕына тута суһал көмөнү ыҥырарга сүбэлээтэ.
Бэс ыйын 3 күнүнээҕи көрдөрүүнэн, өрөспүүбүлүкэҕэ, уопcайа 2214 киһи коронавирустаабыта бигэргэтиллибит. Кэлиҥҥи сууккаҕа 98 киһи ыалдьыбыт: Дьокуускайга – 64, Мэҥэ Хаҥаласка – 22, Чурапчыга – 5, Нерюнгрига – 2, Өймөкөөҥҥө – 2, Намҥа – 1, Хаҥаласка – 1, Мииринэйгэ – 1.
Олохтоохтор оҕо былаһааккатыттан уонна үлэ кэлэктииптэригэр сылдьан сысталларын ыйда. Итиэннэ коронавирус бэлиэтэнэр улуустарын биирдиилээн ырытта. Дьокуускайга улахан кыһалҕа Хатаска баарын эттэ. “Студкуораты” аахсыбатахха, Хатаска балачча элбэх киһи ыалдьыбыт, онон кыра кыһалҕалаах дьон элбэхтик кэлбэттэригэр-барбаттарыгар сүбэлээтэ.
“Нам улууһугар балаһыанньа биллэр. Харантыыҥҥа Салбаҥ нэһилиэгэ олорор. Билигин Салбаҥ уулуссаларыгар полиция үлэһиттэрэ уонна волонтердар эрэ сылдьаллар. Харантыын быраабылата оннук. Үтүөрбүт дьон эмиэ бааллар эрээри, харантыын уһуллуор диэри Салбаҥтан тахсыа суохтаахтар.
Чурапчыга дьиэнэн ыалдьыы бэлиэтэнэр. Хантаактаах киһи дьиэ кэргэнин сыһыарар.
Хомойуох иһин, Нам улууһугар ыам ыйын 9 күнүгэр буолбут түгэн Мэҥэ Хаҥаласка хатыланна. Ыарыыга сыстан баран ыалдьыттыы кэлбиттэр”, — диэн иһитиннэрдэ.
Хаҥалас улууһугар биир-икки ыалдьыбыт киһи бэлиэтэниитигэр, дьон кимтэн сыстыбытын билиигэ миэрэни кытаатыннарыахха сөп этэ диэн эттэ.
Ольга Балабкина үтүөрбүт дьон ахсаана 1000-ҕа чугаһаабытын иһитиннэрдэ. Ол эрээри, ыарахан туруктаахтар эбиллэн иһэллэрин бэлиэтээтэ.
Ону тэҥэ, чинчийии бэрээдэгин арыый уларыппыттарын, үлэ тэтимирбитин эттэ.
ОРВИ сибикитэ баар, температура тахсар буоллаҕына тута суһал көмөнү ыҥырыҥ, сэрэтиҥ диэн сүбэлээтэ.
Людмила ПОПОВА, “Саха сирэ” хаһыат, edersaas.ru