ОРВИ, кириип уонна коронавирустан быһыы. Ил Дархан улуус баһылыктарыгар саҥа соруктары туруорда

Ол гынан баран, Ил Дархан «дьаҥы кыайдыбыт» диир билигин да эрдэтин бэлиэтээтэ. Маныаха билигин да сорох улуустарга ыалдьааччылар эбиллэллэрэ бэлиэтэнэрин эттэ. Онон билигин да мааскалаах сылдьыы, социальнай арыты тутуһуу, дезинфекцияны ыытыы син биир наадатын тоһоҕолоото.

Билигин да ирдэнэр хааччахтыыр миэрэлэри тутуһар, маассабай тэрээһиннэргэ ону учуоттуур ирдэнэрин ыйда. Кини куораттартан, улуустартан успуорка күрэхтэһиилэри тэрийиигэ сайаапкалар киириилэрэ элбээбитин ыйда. «Успуорт күрэхтэһиитигэр хантаактаһыы ордук тахсара уонна дьаҥҥа сыстар куттал улаатара өйдөнөр. Онон дезинфекцияны тиһиктээхтик ыытар, тус көмүскэнэр сириэстибэлэринэн туһанар наада», — диэн бэлиэтиир.

Ил Дархан аптекаларга эмп баар буолуутун хонтуруолга тута сылдьары, быһыыны биэрии тэтимин бытаардыбакка тэрийэри уонна быһыыны бастакынан аҕам саастаах дьон, дьарҕарбыт ыарыылаахтар ылыахтаахтарын эттэ. «Билигин төһөнөн элбэх киһи быһыыны ылар да, соччонон холкутуйуохпут», — диэтэ Айсен Сергеевич. Маны сэргэ, кини коронавирус дьаҥын утары охсуһар кэмҥэ атын дьаҥ туһунан умнар сатамматын бэлиэтээтэ. ОРВИ, кириип, оһоҕос инфекциятын эттэ.

СӨ кылаабынай санитарнай бырааһа Маргарита Игнатьева оройуон баһылыктарыгар туһаайан, дьыл бу кэмигэр өрүү биллэр ОРВИ бэлиэтэнэрин эттэ.  Ааспыт нэдиэлэҕэ оскуолаҕа үөрэнэр саастаах оҕолор тымныйан ыалдьыылара 41 % элбээбит. Ол гынан баран, оҕолорго эпидемическэй ыарыы үрдээһинэ бэлиэтэммэт. Оттон оһоҕос инфекциятыгар, өрөспүүбүлүкэҕэ  уһуйааннар уонна оскуолалар аһылыгы бэлэмниир сирдэригэр (пищеблоктарга) лабораторнай чинчийиилэр ыытыллаллар. Бүгүҥҥү күҥҥэ биир тыһыынчаттан тахса үлэһиттэн анаалыс ылыллыбыт.