Оруобуна сыл анараа өттүгэр өрөспүүбүлүкэҕэ коронавируһунан ыалдьыбыт бастакы киһи биллибитэ
Былырыын бу күн, кулун тутар 17 күнүгэр, Дьокуускайдааҕы клиническэй балыыһаҕа өрөспүүбүлүкэҕэ аан маҥнайгынан коронавирустаабыт пациент киирбитэ.
edersaas.ru
Кини кэнниттэн атын пациеннар коронавируһу эмтиир балыыһаҕа киирэн саҕалаабыттара. Биллибэт саҥа ыарыыны утары охсуһууга аҕыс тыһыынчаттан тахса быраас, мэдиссиинэ персонала туруммута. Бары улуустарга кыра бириэмэ иһигэр обсерватордар үлэлэрин саҕалаабыттара, балыыһаларга эбии эмтэнэр миэстэлэр арыллыбыттара. ИВЛ-аппараатын, салгын станцияларын, көмпүүтэр томографтарын атыыласпыппыт.
Тута өрөспүүбүлүкэ үрдүнэн хааччахтааһын миэрэлэрэ киирбиттэрэ. Нэһилиэнньэ ыраахтан олорон үлэлииргэ, үөрэнэргэ күһэллибитэ. Сынньалаҥ, култуура эбийиэктэрэ, маҕаһыыннар, эрэстэрээннэр үлэлэрин тохтоппуттара. Оннооҕор дэриэбинэлэргэ тастан киирии бобуллубута.
Дьоҕус урбаан өйөбүлүгэр диэн 35 миллиард солкуобай көрүллүбүтэ. Оҕолордоох дьиэ кэргэннэргэ үс миллиардтан тахса солкуобай көрүллүбүтэ. Ил Дархан Айсен Николаев кыһыл зонаҕа үлэлиир миэдиктэргэ көҕүлүүр төлөбүрдэри анаабыта. Ону таһынан, Ил Дархан ыйааҕынан, кырдьаҕастарга көмөлөһөр волонтердар кииннэрэ баар буолбуттара. Саха сирин тыһыынчаттан тахса волонтердара бородуукта, эмп-том таспыттара.
Буолаары турар улахан далааһыннаах тэрээһиннэр көһөрүллүбүттэрэ. Ол иһигэр, БКЭ, бүтэһик чуораан, Кыайыы параада, ыһыах о.д.а. тэрээһиннэри онлайн киэбинэн көрсүбүппүт.
Атырдьах ыйын 11 күнүгэр Арассыыйа учуонайдара аан дойдуга бастакынан коронавирс утары «Спутник V» вакцинаны оҥорон таһаарбыттара. Балаҕан ыйын саҥатыгар өрөспүүбүлүкэҕэ вакцина маҥнайгы баартыйата кэлбитэ.
Саҥа дьыллааҕы этиигэ Айсен Николаев 2021 сылы Доруобуйа сылынан биллэрбитэ. Тохсунньу 19 күнүттэн маассабай быһыы саҕаламмыта. Нэһилиэнньэ эрэммэтэх курдук «эн ыл, мин ыл» дэсиһэн баран, кэнники кэмҥэ хамаҕатык ылар буолла. Быһыы баартыйата кэллэр эрэ утары бүтэн иһэрэ биллэр.
Кулун тутартан саҕалаан, Ил Дархан ыйааҕынан, хааччахтар сыыйа уһуллан эрэллэр. Пааркалар, тыйаатырдар, киинэ тыйаатырдара үлэлэрин саҕалаатылар, санитарнай күннэр күүстэрин сүтэрдилэр. Тэрээһиннэр, бырааһынньыктар көҥүллэнэн эрэллэр.
Ыалдьыбыт дьон ахсаана күнтэн-күн аҕыйаан иһэр.
Виктория Бястинова, «Саха сирэ» хаһыат, edersaas.ru саайт.
Хаартыскалар news.ykt.ru, СИА саайтартан туһанылыннылар.
