Оруоһуттар кыргыттарын үтүлүктэрин куопуйата быыстапкаҕа турда.
19-с үйэҕэ олорон ааспыт баай Оруоһуттар кыргыттара кэтэ сылдьыбыт үтүлүктэрин куопуйатын, «Айыы кыһата» оскуола эбээлэрэ тэрийбит быыстапкаларыгар 3 ”б” кылаас үөрэнээччитэ Туйаарыма Акимова аҕалла. В.И. Иохельсон диэн политсыылынай Америка музейыгар 200 тахса малы-салы илдьэн туттарбыт. Олор быыстарыгар Оруоһуттар кыргыттарын үтүлүктэрэ баар эбит. Бу үтүлүк куопуйатын ким тикпит эбитий?
Акимова Туйаарыма эбээтэ, Таатта улууһун олохтооҕо Слепцова Полина Ивановна Чөркөөххө «Далбар» диэн иистэнньэҥнэр түмсүүлэригэр сылдьан тикпит эбит. Оччолорго, Америкаттан бу Иохельсон урут ыыппыт малларын видеоҕа устан ыыппыттар. Бу видеону бытаардан тохтото-тохтото, туох баар сиигин-уоһун барытын үүт-үкчү үтүктэн ылан, Полина Ивановна тигэн таһаарбыт. Билигин бу быыстапка «Айыы кыһата» оскуолаҕа бээтинсэҕэ диэри турар. Сахабыт маанылаах оһуорун-мандарын, төрүт үгэһин тыыннаахтыы илдьэ кэлбит былыргы үйэтээҕи үтүлүктэргэ көрүҥ.
Ульяна ЗАХАРОВА, «Саха сирэ» хаһыат, edersaas.ru