Орто уонна дьоҕус урбаан тэрилтэлэригэр 200 мөлүйүөн солкуобайдаах көмө оҥоһуллуоҕа
Бүгүн, кулун тутар 27 күнүгэр, киэһэ 17 чааска СӨ бырабыыталыстыбатын бэрэссэдээтэлэ Владимир Солодов өрөспүүбүлүкэ экэниэмикэтин туһунан видео-сибээс нөҥүө брифинг ыытта.
edersaas.ru
Владимир Солодов судаарыстыбаннай тэрилтэлэргэ оҥоһуллар көмө туһунан этиитин саҕалаата.
—Билигин, федеральнай таһымынан тэрилтэлэр монкуруут барыыларыгар мароторий биллэрилиннэ. Дойду экэниэмикэтигэр сыһыаннаах, судаарыстыбаттан өйөбүллээх буолар улахан тэрилтэлэр испиэһэктэрэ оҥоһулунна. Манна АЛРОСА, “Якутуголь”, “Алмазы Анабара” тэрилтэлэрэ киирдилэр. Бу тэрилтэлэргэ судаарыстыба өттүттэн көмө оҥоһуллуоҕа. Бу испииһэккэ өрөспүүбүлүкэ атын тэрилтэлэрэ, холобура, “Колмар” уонна “Якутия” авиахампаанньа киирэллэрин туруорсуохпут.
Ил Дархан Айсен Николаев анал ыйааҕынан өрөспүүбүлүкэ экэниэмикэтин хонтуруоллуур бастайааннай хамыыһыйа тэрилиннэ. Бу хамыыһыйа бэрэссэдээтэлинэн Владимир Солодов ананна. Бу туһунан Владимир Солодов маннык кэпсээтэ:
—Анал хамыыһыйа бэҕэһээ бастакыбытын түмсэн үлэлээтибит. Нэдиэлэ аайы көрсөн мунньахтыыр буолуохпут. Дьоҕус уонна орто урбаан тэрилтэлэрин өйүүргэ өрөспүүбүлүкэттэн 200 мөлүйүөн солкуобай көрүллүөҕэ. Урбаанньыттарга нолуок, куортам сыаната аччаабытын таһынан, күн аайы балаһыанньа хайдаҕыттан көрөн, араас көмө оҥоһуллуоҕа.
Ньургуйаана Иванова, «Саха сирэ» хаһыат, edersaas.ru
Хаартыска интэриниэттэн