Бүгүн, алтынньы 9 күнүгэр, Горнай улууһун Маҥаны нэһилиэгэр икки эбийиэги үөрүүлээх быһыыга-майгыга арыйдылар.
Олохтоохтор көҕүлээһиннэрин (ППМИ) уонна «тыа сирин кэлим сайдыытын» (КРСТ) бырагыраамаларыгар ситиһиилээхтик кыттан, маҥанылар олус тупсаҕай көстүүлээх, дьону-сэргэни уруйдуу көрсөр, ыраах айаҥҥа алгыһынан атаарар «Орто-Сурт» стеланы астылар.
Маны тэҥэ, нэһилиэк кэскилэ сынньанарыгар, оонньууругар аналлаах аныгы ирдэбилгэ толору эппиэттиир Оҕо былаһаакката үөрүүлээхтик аһылынна. Бу туһунан олохтоох дьаһалта исписэлииһэ Анастасия Максимова маннык кэпсиир:
—Тэрээһин коронавирус сыстыганнаах дьаҥын кэминэн учуоттанан, бэйэ икки ардыгар тэйиччи сылдьыыны, мааскалаах, бэрчээккилээх сылдьыы ирдэбилин тутуһан ыытылынна.
Өбүгэ саҕаттан Маҥаны, Бүлүү уонна Дьокуускай икки ардыларын хабыллар ортото эбит. Ол иһин, айан суолун ортотугар турар нэһилиэги «Орто Сурт» диэн ааттаабыттар. «Орто» диэн тыл ис хоһоонун суолтата биллэр буоллаҕына, «Сурт» диэн тыл «ураһа» диэн өйдөбүллээх эбит. Стела ааптара Андрей Осипов баҕа санаатын олоххо киллэрдэ. Бэдэрээччит — «Ректайм» тэрилтэ. Афанасий Киприянов генеральнай дириэктэрдээх тэрилтэ үлэһиттэрэ түргэн-тарҕан туттуулаах, хаачыстыбалаахтык үлэлиир дьон эбит.
Киирии аартыкка аал уоту оттон, арыылаах алаадьынан, кыынньар уохтаах кымыһынан айах тутан, Семен Никифоров алгыс тылы эттэ. Горнай улууһун баһылыга Никита Андреев кэлэн нэһилиэк олохтоохторун эҕэрдэлээтэ. Кини «Махтал суругу» Михаил Текеяновка , «Горнай улууһун Бочуотунай грамотатын стела ааптара Андрей Осиповка туттарда.
«Маҥаны нэьилиэгэ» МТ баһылыга Михаил Текеянов эбийиэктэри туппут дьоҥҥо махтал суруктары туттарда.
Долгутуулаах кэмҥэ кыһыл лиэнтэни Горнай улууһун баһылыга Никита Андреев, Маҥаны нэһилиэгин баһылыга Михаил Текеянов, стела ааптара Андрей Осипов быстылар.
Онтон Оҕо былаһааккатын арыйыы сиэрэ-туома ыытылынна. Манна бэдэрээччит — «Восток капитал» ХЭУо тэрилтэ (сал. Иван Тимофеев). Эбийиэги туппут дьоҥҥо махтал тыл бастыҥа этилиннэ.
Нэһилиэкпит бэртээхэй тутууларын икки тэрилтэ тэҥҥэ түһүнэн туттулар.
Тэрээһини быһа биэриинэн олохтоохтор Instagram ситимигэр @orto_surt & @maganinskii киирэн онлайн нөҥүө көрдүлэр».
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Анастасия Максимова түһэриилэрэ