Орто үөрэххэ туттарсар абитуриеннары кытта көрүстүлэр

Ааптар: 
Бөлөххө киир:

СӨ Үөрэҕин, билимин министиэристибэтэ итиэннэ орто анал үөрэх тэрилтэлэрэ абитуриеннары кытта көрүстүлэр. Бу сырыыга сүрүн болҕомтону 9-с кылаас кэнниттэн туттарсааччыларга уурдулар.

edersaas.ru

Тэрээһиҥҥэ иһитиннэрбиттэринэн, атырдьах ыйын 2 күнүнээҕи туругунан өрөспүүбүлүкэтээҕи орто үөрэхтэргэ, уопсайа, 17 тыһ. кэриҥэ сайабылыанньа киирбит. “Соторутааҕыта дойду бэрэсидьиэнэ Владимир Путин ахсынньы 2 күнүн Орто анал үөрэх күнүнэн биллэрэрин туһунан ыйаахха илии баттаабыта. Онон орто үөрэххэ болҕомто ууруллан, өссө тупсар, саҥардыллар.

Докумуону тутуу салҕанан барар. Быйыл 9-с кылаас кэнниттэн туттарсааччыларга бүддьүөттэн ордук элбэх миэстэ көрүлүннэ – 3351, 11-с кылаас кэнниттэн 2971 миэстэ. Күн бүгүн сайабылыанньаны хото “информационнай систиэмэ уонна программирование”, “оскуола иннинээҕи үөрэхтээһин”, “алын кылаас учуутала”, “эмчит дьыалата”, “сиэстэрэ дьыалата”, “экэниэмикэ уонна буҕаалтыр учуота”, “финансы”, “асчыт”, “кондитер”, “графическай дизайнер”, о.д.а. биэрдилэр”, — диэн СӨ Үөрэҕин уонна билимин миниистирин бастакы солбуйааччы Михаил Присяжнай иһитиннэрдэ.

Тэрээһиҥҥэ 2020 сыллаахха Дьокуускай куорат 23-с нүөмэрдээх оскуолатын бүтэрбит, баҕалаах үөрэҕэр үс сыл устата турунан туран киирбит Вадим Потаповы ыҥырбыттар. Кини быйыл Санкт-Петербурдааҕы гражданскай авиация судаарыстыбаннай  университетыгар пилот идэтигэр киирбит. “Саамай сүрүнэ сыаллаах-соруктаах, тулуурдаах буолуҥ. Тиһэҕэр тиийэ киирсиҥ”, — диэн Вадим абитуриеннарга туһаайан санаатын тиэртэ.

Тэрээһиҥҥэ орто үөрэх тэрилтэлэрин бэрэстэбиитэллэрэ кэлэн абитуриеннарга, төрөппүттэргэ үөрэх кыһаларын туһунан билиһиннэрдилэр. Ол курдук, Дьокуускайдааҕы тыа хаһаайыстыбатын тиэхиньикума “Профессионалитет” федеральнай бырагыраамаҕа кыттан, быйылгыттан уларыйыы бөҕө тахсаары турар. Тиэхиньикум киирэр ааныттан саҕалаан барытын саҥардалларын таһынан, устудьуоннар саҥа лабаратыарыйаларга, тэриллэргэ үөрэниэхтэрэ, быраактыкаларын чааһа эбиллиэҕэ диэн иһитиннэрдилэр. Итиэннэ биир үчүгэйэ диэн саайтарыгар киирэн абитуриент хаһыс миэстэҕэ сылдьарын көрүөн, суоттаныан сөп эбит.

Тустаах үөрэх кыһата 12 исписээлинэскэ, 3 идэҕэ ылар. Быйыл “водные биоресурсы и аквакультура” уонна “технология продуктов питания животного происхождения” диэн быйыл икки саҥа идэни аспыттар.

— Санатан эттэххэ, эбии тургутуулаах (айар, успуорт, тест…) идэлэргэ атырдьах ыйын 10 күнүгэр, онтон атыттарга атырдьах ыйын 15 күнүгэр диэри абитуриеннартан сайабылыанньаны ылаллар.

— Докумуон оригиналын (аттестат) атырдьах ыйын 15 күнүгэр диэри туттараллара ирдэнэр. Туттарбатахтар куонкуруска киирбэттэр.

— Ыйытыылаах дьон 50-60-44 нүөмэринэн эрийэн билсиэххитин сөп.

— Дьокуускайдааҕы сибээс уонна энергиэтикэ кэллиэһигэр баар абитуриеннар ыстааптара атырдьах ыйын 15 күнүгэр диэри үлэлиир.

Үчүгэйэ диэн, бу күн туох даҕаны уочарата, эрдэттэн суруйтарыыта суох “Мои документы” тэрилтэ үлэһитэ абитуриеннарга, тэрээһиҥҥэ кэлбит дьоҥҥо миэстэтигэр Судаарыстыбаннай өҥөҕө порталга учуотунай бэлиэтэниилэрин саҥардан, Пушкинскай каартаны (14-22 саастаахтарга) оҥорон биэрдэ.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0