Сүрүн Үөрэх уонна наука

Орто үөрэххэ куонкурус хайдаҕый?

Саха сирин орто анал үөрэҕин тэрилтэлэригэр сайабылыанньаны бэс ыйын 20 күнүттэн тута тураллар. Уопсайа, 20 439 сайабылыанньа киирбит.

edersaas.ru

СӨ Үөрэҕин уонна наукатын министиэристибэтин орто үөрэххэ салаатын исписэлииһэ Полина Барахсанова иһитиннэрбитинэн, атырдьах ыйын 12 күнүнээҕи туругунан, порталга 20 439 сайабылыанньа бэлиэтэммит.

Порталга көстөрүнэн, ордук элбэх сайабылыанньаны Дьокуускайдааҕы мэдиссиинэ кэллиэһигэр (2 953 сайабылыанньа) биэрбиттэр. Манна биир миэстэҕэ ортотунан 5 киһи куонкурустаһар.

С.Ф. Гоголев аатынан Дьокуускайдааҕы педагогическай кэллиэскэ 1 790 сайабылыанньа киирбит, биир миэстэҕэ 9 киһи куонкурустаһар.

И.И. Фадеев аатынан Дьокуускайдааҕы үп-экэниэмикэ кэллиэһигэр 1 508 сайабылыанньа киирэн, биир миэстэҕэ 16 киһи куонкурустаһар.

 Сүрүн уопсай үөрэхтээһин кэнниттэн туттарсар исписээлинэстэргэ уонна идэлэргэ ордук үп (243 сайабылыанньа), сир-баай сыһыаннаһыыларыгар (257 сайабылыанньа), асчыт, кондитер дьыалатыгар (322 сайабылыанньа) куонкурус үрдүк.

Сүрүн уопсай үөрэх кэнниттэн туттарсааччылар үп (528 сайабылыанньа), эмчит дьыалата (812 сайабылыанньа), сиэстэрэ дьыалата (1 167 сайабылыанньа) идэлэригэр докумуоннарын биэрдилэр”, — диэн Полина Олеговна иһитиннэрдэ.

СӨ Бырабыыталыстыбатын дьаһалыгар олоҕуран, 2021-2022 үөрэх дьылыгар өрөспүүбүлүкэ хааһынатыттан орто үөрэхтэргэ 6 362 бүддьүөт миэстэ көрүллүбүт: орто уопсай үөрэх кэнниттэн – 3 317, сүрүн уопсай үөрэх кэнниттэн – 2 920, кэтэхтэн үөрэххэ – 75, күнүскү-кэтэхтэн үөрэххэ – 50.

Санатан суруйдахха, атырдьах ыйын 15 күнүнэн Дьокуускай куоракка баар орто үөрэх тэрилтэлэрин күнүскү (очно) көрүҥэр докумуону тутан бүтэллэр. Миэстэ баар түгэнигэр сэтинньи 25 күнүгэр диэри тутуохтарын сөп. Сайабылыанньаны https://edu.e-yakutia.ru Саха Өрөспүүбүлүкэтин үөрэҕин порталынан ылаллар. Сиһилии (84112) 50-60-44 нүөмэринэн чопчулуоххутун сөп.

 

Людмила ПОПОВА, “Саха сирэ” хаһыат, edersaas.ru

Ааптар хаартыскаҕа түһэриитэ.

2
0