Саха сиринээҕи орто үөрэх кыһаларыгар (кэллиэс, тиэхиньикум) 2022-2023 үөрэх дьылыгар, уопсайа, 6422 бүддьүөт миэстэтэ көрүллүбүт. Бүгүҥҥү күн туругунан 11-с кылааһы бүтэрээччилэртэн 6000-тан тахса, 9-с кылааһы бүтэрээччилэртэн 3000-тан тахса сайабылыанньа киирбит.
СӨ үөрэҕин уонна билимин миниистирин бастакы солбуйааччы Михаил Присяжнай:
— Абитуриеннарга табыгастаах буоларын туһугар быйыл сайабылыанньаны электроннай көрүҥүнэн ылабыт. Балачча элбэх оҕо сокуоннай сааһын ситэ илик, кинилэр төрөппүттэрэ туруорсууларынан СӨ Үөрэҕин уонна билимин министиэристибэтэ Дьокуускайдааҕы сибээс уонна энэргиэтикэ кэллиэһигэр абитуриеннар ыстааптарын тэрийэргэ быһаарыммыта. Ону таһынан, тустаах кэллиэскэ оскуолаларга, уһуйааннарга, эбии үөрэхтээһин тэрилтэлэригэр үлэҕэ ылыы ыстааба эмиэ үлэлиир.
Эһиги ийэлэргит, аҕаларгыт, эбэлэргит, эһэлэргит кэллиэстэр уонна тиэхиньикумнар арыый атын туруктаахтарын өйдүүр буолуохтаахтар. Аҕыйах сылтан бэттэх саҥа, аныгы тэриллэр баар буоллулар. Маастардар бары үөрэҕи ааспыттара, — диэн абитуриеннары кытта көрсүһүү кэмигэр эттэ.
Орто үөрэххэ туттарсарга аттестат орто баалын сэргэ портфолионы көрөллөрүн, ВорлдСкиллс (юниордар), атын даҕаны куонкурустарга кыттыы эмиэ учуоттанарын ыйда. Быйыл РФ Үөрэҕириигэ министиэристибэтэ юниордарга ситиһиилэммит анал бэлиэнэн бэлиэтээбит оҕолоро икки бүк эбиллибиттэрин, бу абитуриеннар саҥа мастарыскыайдары, лабаратыарыйалары номнуо билэллэрин иһитиннэрдэ.
“Быйыл “технология воды, топлива и смазочных материалов на электрических станциях”, “релейная защита”, “монтажник технологического оборудования”, “мастер по техническому обслуживанию и ремонту машинно-тракторного парка”, “музыкальное искусство эстрады” саҥа идэлэр аһыллыннылар, ити сорохторун эрэ ааттаатым”, — диэтэ. Итини таһынан “компьютерные системы и комплексы”, “технология аналитического контроля химических соединений”, “повар судовой”, “анимация (по видам)”, “спорт”, “флористика” саҥа идэлэргэ үөрэххэ ылаллар.
Миниистири бастакы солбуйааччы Саха сирин кэллиэстэригэр, тиэхиньикумнарыгар курдук дойду биир даҕаны үрдүк үөрэҕэр бэлэмнээбэттэрин, үлэ ырыынагар, бастатан туран, оробуочай идэлэр ирдэнэллэрин тоһоҕолоон эттэ.
Өрөспүүбүлүкэ орто үөрэхтэригэр эбии тургутуулаах (айар, эт-хаан, уйулҕа) идэлэргэ сайабылыанньаны от ыйын 10 күнүгэр, онтон атыттарга от ыйын 15 күнүгэр диэри ылаллар.
Людмила ПОПОВА, “Саха сирэ” хаһыат, edersaas.ru
Хаартыска: СӨ Үөрэҕин уонна билимин министиэристибэтэ.