Орто Халыма улууһун Сиэн Күөлүгэр ыксаллаах быһыы-майгы эрэсиимэ биллэриллиэҕэ

Ааптар: 
Бөлөххө киир:

Муниципальнай тэриллии таһымынан ыксаллаах быһыы-майгы эрэсиимэ биллэриллиннэҕинэ,  ойуур баһаарын умуруорууга эбии көмө тиийэр. Итиннэ сөптөөх дьаһалы  суһал ыстаап салайааччыта, СӨ Бырабыыталыстыбатын бэрэссэдээтэлин 1-кы солбуйааччы  Дмитрий Садовников биэрдэ. 

Ойуур баһаара Орто Халыма уонна Аллараа Халыма улуустарын икки ардыларыгар куталаах сиргэ-уокка умайар. Бэрт аҕыйах кэм иһигэр 2 тыһ. кэриҥэ гектардаах сири мэҥиэстибит. Бүгүн Ми-8 бөртөлүөт икки рейсы оҥорон, «Авиалесоохрана» 20 исписэлииһин тиэртэ. Итини тэҥэ, олохтоохтор көмөҕө тиийиэхтэрэ.

Өрөспүүбүлүкэ үрдүнэн бүгүн 16 чааска 15 ойуур баһаара күөх дуолу мэҥиэстэр. Өлүөхүмэ улууһун Бэс Күөлүттэн 25 км ыраас сиргэ умайар уоту умуруорууга 50 киһи үлэлиир. Эбии көмөҕө диэн Бүлүү улууһуттан 20 киһи тиийиэҕэ.  Итини тэҥэ, Түбэ сэлиэнньэтиттэн 357 км ыраах сиргэ умайар ойуур баһаара  тохтотуллубут. Бүгүн, этэҥҥэ буоллаҕына, умуруоруллуоҕа. Итиннэ үлэлиир 9 исписэлиис Бэс Күөлүгэр көмөҕө тиийиэхтэрэ. Ленскэй оройуонун Дорожнай сэлиэнньэтиттэн 23 км ыраах умайар ойуур баһаарын умуруорууга 13 киһи үлэлиир.  Бу күннэргэ Муома уонна Үөһээ Халыма улуустарыгар уонна бэс ыйын 17 күнүттэн 20 күнүгэр диэри киин, соҕуруу уонна арҕаа улуустарга ойуур баһаардара үөскүүр кутталлаах кэмнэр тураллар диэн быһаарбыттар.

+1
0
+1
0
+1
0
+1
0
+1
0
+1
0
+1
0