Уопсастыба

Орто Халыма улууһун Эбээх сэлиэнньэтигэр мэҥэ бэлиэ турда

Орто Халыма улууһун 2-с Хаҥалас нэһилиэгин олохтоохторугар балаҕан ыйын 23 күнүгэр умнуллубат түгэн буолан ааста.

Бу туһунан Эбээхтэн уопсастыбаннай кэрэспэдьиэммит Людмила Никитина бу курдук билиһиннэрдэ:

Нэһилиэк дьокутааттарын сэбиэтэ  2019 сыл муус устар 24 күнүгэр 2-с Хаҥалас нэһилиэк гербэтэ уонна былааҕа бигэргэммитэ. Арассыыйа Судаарыстыбаннай геральдическай регистригэр 2020 сыл балаҕан ыйын 23 күнүгэр гербэ — 13043, былаах — 13044 регистрационнай нүөмэринэн киирэн, өр күүппүт туруорсубут баҕа санаабыт туолбута.
Гербэ уонна былаах ааптара — киэн туттар киһибит, РСФСР норуотун үөрэҕириитин туйгуна, РСФСР оскуолаларын үтүөлээх учуутала, суруйааччылар сойуустарын норуоттар икки ардыларынааҕы түмсүүтүн уонна РФ суруналыыстарын сойууһун чилиэнэ. I, II Хаҥалас нэһилиэктэрин, Орто Халыма улууһун бочуоттаах гражданина, СӨ үөрэхтээһинин бочуоттаах бэтэрээнэ Василий  Ефимов-Сыркыс. Кини билигин биһиги кэккэбитигэр суох да буоллар, өрүү аатын ааттатар, үйэлэр тухары умнуллубат бэлиэни хаалларда.
Маны таһынан, Орто Халыма куораттан нэһилиэккэ киириигэ стела оҥоһуллан, үөрүүлээх быһыыга-майгыга арылынна. Стела үрдүнэн ортотугар Эбээх нэһилиэгин гербэтэ, икки өттүгэр тыа хаһаайыстыбатынан дьарыктанар нэһилиэк буолан, оҕус уонна сылгы ойуута ыйаммыт. Мэҥэ бэлиэ ортотугар улуус каартата уонна нэһилиэк историята кылгастык арыллан суруллубут. Иннигэр  Арассыыйа, Саха Өрөспүүбүлүкэтин уонна нэһилиэк былааҕа турар гына оҥоһуллубут. Кэлин өттүгэр күн тахсыытын хаартыската турар. Хараҥардаҕына, чаҕылхай уотунан сырдатыы оҥоһуллубута, нэһилиэк олохтоохторун олус үөртэ.

2-с Хаҥалас нэһилиэгин дьаһалтатын 35 №-дээх уурааҕынан балаҕан ыйын 23 күнэ сыл аайы нэһилиэк гербэтин  уонна былааҕын күнүнэн бигэргэннэ.
Түгэнинэн туһанан, нэһилиэк  баһылыгар  Юрий Гуляевка олохтоохтор ааттарыттан барҕа махталбытын биллэрэбит. Нэһилиэк сайдыытыгар өссө да ситиһиилээх үлэни баҕарабыт.

Елена ПОТОЦКАЯ, “Саха сирэ” хаһыат, edersaas.ru

0
0