Арассыыйа ЫБММ Саха Өрөспүүбүлүкэтигэр управлениета муус барыытын кэмигэр кутталлаах балаһыанньа үөскээбэтин кыраҕытык кэтиир. Орто халыма оройоунугар муус балаһатын эстэрэн, уу таһыма аччаата.
Өлүөнэ эбэҕэ муус Дьокуускай, Нам уонна Кэбээйи оройуоннарын сирдэринэн устар. Муус барыытын аллараа кырыыта Сангаар бөһ. 20 км аллараа устар, оттон үөһээ кырыыта Кангалас бөһ. таһыгар, уу таһыма 730 см (кутталлаах таһым – 1370 см). Дьокуускай к. таһыгар уу таһыма 603 см тэҥнэһэр (кутталлааҕа –даамбаны учуоттаан 990 см). Муус устуутун уһуна 312 км. Чугастааҕы сууккаҕа – муус Эдьигээн оройуонун кыраныыссатыгар тиийиэҕэ. Ыам ыйын 22-24 күннэригэр “Эдьигээн – Дьардьаан” учаастагар хамсыаҕа, диэн Арассыыйа ЫБММ СӨ пресс-сулууспата иһитиннэрдэ.
Бүлүү өрүскэ муус барыыта Кэбээйи оройуонун сиринэн ааһар. Муус барыытын уһуна 46 км тэҥнэһэр. Чугастааҕы сууккаҕа муус барыыта өрүс сүнньүнэн ааһыаҕа.
Өлөөҥҥө муус барыыта көхтөөхтүк Өлөөн оройуонугар бара турар. Муус барыытын аллараа кырыыта Түмэти гидропуос таһыгар бэлиэтэнэр, уу таһыма 1275 см тэҥнэһэр, кутталлаах балаһыанньа суоһаабат. Үөһээ кырыыта Түмэти гидропуоһуттан 150 км үөһээ бара турар. Муус барыытын уһуна 150 км тайыыр. Ыам ыйын 23-25 күннэригэр муус барыыта Булуҥ оройуонугар күүтүллэр.
Билигин Халыма өрүскэ Орто Халыма оройуонун сиринэн-уотунан барар. Аллараа кырыыта “Банские острова” таһыгар бэлиэтэнэр, үөһээ кырыыта Орто Халыма куоратын таһыгар. Уу таһыма 1119 см (кутталлаах таһыма – 1200 см). Зырянка таһыгар уу таһыма — 515 см. Ыам ыйын 25-28 күннэригэр муус барыыта өрүс аллараа өттүгэр күүтүллэр.
Дьааҥы өрүскэ Усуйаананан устар. Аллараа кырыыта Үбүлүөйдээх гидропуос таһыгар бэлиэтэнэр, уу таһыма 863 см (кутталлаах – 1350 см). Муус барыытын уһуна 201 км тайыыр.
Индигир эбэҕэ үөһээ өттүгэр муус халҕаһата алдьаныыта көстөр. Ыам ыйын 31-23 күннэригэр муус хамсааһына күүтүллэр.
“Ыам ыйын 20 күнүгэр Орто Халыма куоратыттан аллараа 32 км Халыма өрүскэ эһэр үлэлэр ыытыллыбыттара, ити көмөтүнэн муус балаһата алдьанан, уу таһыма аччаан эрэр. Уопсайа биэстэ эстэрдилэр. Онно 4950 киилэ эстэрэр веществону туһаннылар. Халыма эбэҕэ харыы бэлиэтэммэт”, — диэтэ Арассыыйа ЫБММ Саха Өрөспүүбүлүкэтигэр Кылаабынай управлениетын начаалынньыга Павел Гарин.
Сахагов саайтан
Бэлэмнээтэ Женни Стрюкова
Хаартыска: тустаах саайтан