Нэһилиэккэ уу критическэй таһыма 1250 см тэҥнэһэринэн, ыам ыйын 27 күнүгэр уу таһыма 1164 см буолбутугар, толору бэлэмнээх буолуу эрэсиимэ олохтоммута. Онтон, ыам ыйын 30 күнүгэр ыксаллаах быһыы-майгы биллэриллибитэ. Бу күн 108 киһи, ол иһигэр 33 оҕо олорор 34 дьиэ тиэргэнигэр уу киирбитэ, 10 киһи, ол иһигэр 3 оҕо олорор 3 дьиэ ууга барда. Г.Слепцов аатынан уулусса 90%, Лесная уулусса 30% халааннаата. Маны тэҥэ, 100 миэтэрэлээх уопсай ититэр ситим уу анныгар сытар. Бу туһунан Улус.медиа сайт суруйар.
Ууга барбыт дьиэ ахсаана элбээн, 12 буолбута. Бу күн улахан дьону тэҥэ 15 оҕо бөртөлүөтүнэн улуус киинигэр кэлбиттэрэ. Налимскай орто оскуолатыгар тэриллиэхтээх лааҕыр үбүнэн Орто Халымаҕа «Спектр» оҕо сайдар киинигэр лааҕыр аһылынна.
Быстах кэмҥэ дьону олохсутар пуун «Айаан» Култуура киинигэр тэриллибитэ даҕаны, дьиэлэрин ууга былдьаппыт дьон аймахтарынан көспүттэрэ.
Онон, быйылгы халаан нэһилиэккэ элбэх хоромньуну таһаарбытынан, нэһилиэк иһинээҕи Г.Слепцов уонна Лесная уулуссалары тэҥэ, Орто Халыма-Налимскай суолу чөлүгэр түһэриини, халаан кэмигэр сүөһүлэри үрдүк сиргэ таһаарар Холчур итиэннэ Арыылаах учаастактары саҥардыыны, Хаппыт Билии сиэнин ыраастааһыҥҥа үбүнэн көмөлөһүүнү, ууга олоччу ылларбыт, өрөмүөн туһалаабат буолбут дьиэлээхтэргэ сэртипикээти, инбэлииттэргэ, тыыл бэтэрээннэригэр, элбэх оҕолоох ийэлэргэ санаторийга, профилакторийга путёвканы, оскуола саастаах оҕолору лааҕырынан хааччыйыыны, хаарбах туруктаах үрдүк күүрүүлээх линиялар өрөмүөннэрин нэһилиэк баһылыга В.П.Оконешников уонна нэһилиэк дьокутааттарын Сэбиэтэ бырабыыталыстыбаҕа туруорсуохтара.
Сыбаатайга бэс ыйын 5 күнүгэр Алаһыай өрүс барбыта. Уу таһыма кыралаан үрдүүр, бүтэһик суукка аҥаарыгар 10 см эбиллэн, бэс ыйын 8 күнүгэр сарсыарда уу таһыма 683 см буолла.
Оттон Арҕахтаахха критическэй таһым 777 см эбит буоллаҕына, бу күн туругунан 722 см тэҥнэстэ.
Ааптар: Алёна КУДРИНА,
Ulus.media сайта ылылынна.