Хоту улуустарга быйыл хаһааҥҥытааҕар да халлаан итийдэ. Эбиитин бөһүөлэктэр чугастарынан ойуур баһаардара туран, билигин быһыы-майгы сытыырхайда.
edersaas.ru
Муома улууһун баһылыга Иван Павлов:
— Улууска балаһыанньа тыҥааһыннаах. Халлаан итии. Сир-дойду курааннаан турар. Уот оттуур ходуһаларга киирдэ. Буруо хойуу буолан Дьокуускайтан кэлэр үс рейс тохтоото. Ойуур баһаарын умулларыыга кэлбит бөртөлүөт Буор Сыһыы уонна Хонуу сэлиэнньэлэрин аттыгар үлэлээтэ. Бүгүн буруонан сибээстээн көтө илик. Балаһыанньа уустугунан, Дьокуускайтан кэлбит дьону салгыы манна баһаары умулларыыга көмөлөһө хаалалларыгар көрдөстүм, — диэн суһал ыстаапка иһитиннэрдэ.
Онтон Орто Халыма оройуонун баһылыгын бастакы солбуйааччыта Руслан Гаврильев:
— Сыбаатайтан 1 км сиргэ баар баһаартан ураты өссө биир сиринэн уот турда. Бу дэриэбинэттэн 2 км сиргэ. Бу түүнтэн манна үлэ ыытыллар. Өлөөкө Күөлгэ баһаары утары үлэ тохтообот. Эбээхтэн 5 км сиргэ баһаар турда, — диэн кэпсээтэ.
edersaas.ru