Өрөспүүбүлүкэ Ил Дархана Айсен Николаев Орто Халыма оройуонугар үлэлиир.
edersaas.ru
Оробуочай сырыытын кэмигэр кини Халыма бөлөх оройуоннарын кытта видео-сибээһинэн Халыма өрүскэ сааскы халаан уутун содулун туоратыы боппуруоһун дьүүллэстэ.
“Билиҥҥи туругунан, саамай ыгым балаһыанньа Аллараа Халыма оройуонугар үөскээтэ. Миэстэтигэр ЫБММ суһал бөлөҕө, быыһыыр сулууспа уонна оройуон дьаһалтата үлэлииллэр. Күн-дьыл туруга эмискэ уларыйбакка, халаан оройуоҥҥа, Орто да, Үөһээ да Халымаҕа этэҥҥэ ааһыа диэн эрэнэбит”, — диэн мунньаҕы баһылык түмүктээтэ.
Саха сирин баһылыга өрөспүүбүлүкэ бырабыыталыстыбатыгар быйыл Орто Халыма куоракка суол тиһигэ алдьаныытын толуйарга сорудахтаата.
Мунньах кэнниттэн суруналыыстар Айсен Николаевка Арктика зонатыгар тыа хаһаайыстыбатын сайдыытын туһунан боппуруоһу биэрдилэр.
“Дойду Арктикатааҕы зонатыгар биһиги аҕыс улууспутун дьиҥ таһымнаахтык эбии киллэрдилэр. Бу быһаарыынан сибээстээн, Госдуума сыл устата Арктиканы тэтимнээхтик сайыннарар туһунан кэккэ сокуоннары ылыныа диэн эрэнэбит. Олорго олоҕуран, Арктика тыа хаһаайыстыбатын, бырамыысыланнас, таҥастааһын эбэтэр олохтоох оҥорон таһаарыы курдук эйгэлэригэр ханнык баҕарар бырайыактарга нолуокка дьоһун чэпчэтиилэр оҥоһуллуохтара, ити иһигэр кэккэ нолуоктартан олоччу босхолонууга”, — диэтэ Айсен Сергеевич.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.