Орто Халымаҕа быһыыны ылбыттарга «Буран» оонньонуоҕа

Бөлөххө киир:

Орто Халыма оройуонугар коронавируһу утары быһыыны ылбыттар ортолоругар хоту сиргэ саамай наадалаах тиэхиньикэни — «Бураны» оонньотуохтара. Бу туһунан оройуон аҕа баһылыга Евгений Слепцов иһитиннэрбит.

«Сыл бүтүүтэ оройуоммутугар коронавируһу утары быһыыны ылбыт дьон икки ардыгар лотерея оонньотуохпут. Бу лотереяҕа балаҕан ыйын 19 күнүгэр диэри быһыыны манна, Орто Халымаҕа ылбыт дьон кытталлар. Дьиҥэ, былаан быһыытынан, эрдэ ыытыахтаах этибит, ол эрээри эпидемиологическай балаһыанньа уустугуран тэрээһиммитин көһөрбүппүт. «Бураны» таһынан лотереяҕа араас сыаналаах бириистэр оонньонуохтара», — диэн Евгений Михайлович санаатын үллэһиннэ.

Оройуон киин балыыһатын кылаабынай бырааһын солбуйааччы Иван Нетребенко этэринэн, бүгүҥҥү күҥҥэ оройуон үрдүнэн 3,3 тыһыынча киһи коронавирус дьаҥын утары быһыыны ылбыт. Ол нэһилиэнньэ 67,8%-ыгар тэҥнэһэр. Маны таһынан 71,1% 60 сааһын ааспыт 921 киһи быһыыны ылбыт. Оттон ревакцинацияны алта ый кэнниттэн 64 киһи ааспыт.

«Оройуон үрдүнэн биир бастакынан коронавирус дьаҥын утары быһыыны мин ылбытым. Мин саныахпар, олохтоох салалта бэйэтин холобурунан көрдөрүөхтээх. Сиэстэрэ миэхэ быһыыны аан бастаан туруорарыгар долгуйбутун билигин да умнубаппын. Мин кэннибиттэн түөрт сиэстэрэ ылбыта. Быһыыны туруоттарбытым кэнниттэн туох да биллибэтэҕэ. Арай ылбыт сирим онно кыратык ыалдьара, нөҥүө күнүгэр ааспыта», — диэн кылаабынай бырааһы солбуйааччы Иван Нетребенко этэр.

Ульяна ЗАХАРОВА бэлэмнээтэ.

Хаартыска — buran-world.ru

+1
0
+1
0
+1
0
+1
0
+1
0
+1
0
+1
0