Сэтинньи ыйдааҕы туругунан, Орто Халыма улууһугар 191 хаһаайыстыбаннай субъект баарыттан, 181 хаһаайыстыба «Меркурий» систиэмэҕэ регистрацияны ааспыт, итинэн көрдөрүү 94 %-ҥа тэҥнэспит.
Бу күннэргэ эрэгийиэннээҕи судаарыстыбаннай бэтэринээринэй надзор территориятаҕы салаатын ыстаарсай судаарыстыбаннай бэтэринээринэй иниспиэктэрэ Артем Бурцев Орто Халыма улууһугар куоракка кэлэн үөрэх, доруобуйа харыстабылын тэрилтэлэрин үлэһиттэригэр, бааһынай хаһаайыстыбалаахтарга, балыгынан, булдунан дьарыктанар дьоҥҥо, урбаанньыттарга уо.д.а. «Меркурий» систиэмэ үлэтин, докумуону сөпкө толоруу, регистрацияланыы туһунан үөрэҕи ыытта.
— «Меркурий» систиэмэҕэ тыа хаһаайыстыбатын бородууксуйата эрэ киирбэт, бэтэринээринэй сулууспа хонтуруоллуур таһаҕаһа барыта учуоттанар, барытыгар бэтэринээринэй арыаллыыр докумуон толоруллара ирдэнэр. Хас биирдии үүтү, эти, балыгы туттарааччы, тутааччы, атыылааччы, тиэйэр-таһар, оҥорон таһаарар тэрилтэ, хаһаайыстыба оҕо-аймах, дьон-сэргэ аһыыр аһылыгар эппиэтинэстээхтик сыһыаннаһыахтаах. Ол инниттэн бородууксуйа куттала суох буоларын мэктиэлэтэрин умнуо суохтаах, — диир Артем Николаевич.
Улууска сүөһү иитиитинэн дьарыктанар биэс тэрилтэ бары, 19 бааһынай хаһаайыстыбаттан 17-тэ уонна 71 кэтэх хаһаайыстыба систиэмэҕэ регистрацияламмыттар. Тыа хаһаайыстыбатын бородууксуйатын оҥорон таһаарар икки тэрилтэ иккиэн, 11 оскуолаттан 9-һа, 13 оҕо саадыттан 11-рэ, доруобуйа харыстабылын икки тэрилтэтэ, 33 бытархай атыы-эргиэн тэрилтэтиттэн 29-һа, икки кууһунан атыы тэрилтэтэ «Меркурий» систиэмэҕэ үлэлиир көҥүллээхтэр. Балыктааһыҥҥа 27 хаһаайыстыба бары регистрацияламмыттар.
Палеонтологическай матырыйаалы хомуйуунан дьарыктанар икки дьоҕус тэрилтэ, икки урбаанньыт, булдунан дьарыктанар икки дьоҕус тэрилтэ пароль уонна логин ылбыттар. 2018 сыл от ыйын 1 күнүттэн саҕалаан 2019 сыл алтынньы ыйынааҕы туругунан, Бэтэринээринэй-тургутар лабораториялаах Орто Халыма улууһун бэтэринээринэй управлениетын нөҥүө 524 бэтэринээринэй арыаллыыр докумуон толорулунна.
Римма Ноговицына,
Орто Халыматтан «Саха сирэ» хаһыакка,
edersaas.ru саайтка анаан.