Орто Халыма улууһун киинигэр худуоһунньук Галина Слепцова «LETO YAKUTIA» бэстибээл чэрчитинэн “Хотугу түүн муусуката” муралы Оҕо ускуустубатын оскуолатын эркинигэр уруһуйдаата.
Саҥа арт-эбийиэги Галина тымныы күн-дьыл уонна ардах-хаар мэһэйдээн үс нэдиэлэнэн уруһуйдаата. Айымньытын туһунан эдэр худуоһунньук маннык кэпсиир:
— Мурал эскииһин Кыыдаана Игнатьевалыын тэҥҥэ толкуйдаабыппыт. Эркини уруһуйдуурга бастакы уопутум буолан, Кыыдаана олус элбэҕи сүбэлээбитэ. Мурал ис хоһоонугар биһиги култуурабыт, хотугу фольклор олук буолла. Уруһуйбар төрүттэрбит олохторун, биһиги устуоруйабытын ойуулаатым.
Ый бүтүүтэ Галина олохтоох кырачааннарга анаан маастар-кылаас ыытыаҕа. Оттон мурал үөрүүлээх арыллыыта Оҕо ускуустубатын оскуолатын арыллыытын кытта сэтинньигэ буолара былааннанар.
Санатан суруйдахха, «LETO YAKUTIA» бэстибээл Саха сиригэр Сомоҕолоһуу, Дьокуускайга Үтүө ыаллаах буолуу сылларын иитинэн ыытыллар. Бэстибээл чэрчитинэн хас биирдии куорат уонна сэлиэнньэ уратытын бэлиэтиир гына уулуссалары, дьиэлэри киэргэтиэхтэрэ.
edersaas.ru