Ыам ыйын 4 күнүгэр Орто Халыма улууһун быыһааччыларын сулууспатыгар муус устар 12 күнүгэр Дьокуускайтан Андрюшкиноҕа диэри икки массыынанан айаннаабыт алта киһи ыам ыйын 1 күнүгэр Дьааҥы Арыылааҕыттан сибээскэ тахсан баран, сүппүттэрин туһунан иһитиннэрии киирбитэ.
Орто Халыма улууһун быыһааччыларын сулууспатын начальнига Алексей Тарасов салайааччылаах суһал бөлөх «Бурааннарынан» көрдөөһүҥҥэ туруммута. Туох да сурах-садьык, суол-иис суоҕун иһин, Ыксаллаах быһыы-майгы кэмитиэтин быһаарыытынан, быыһааччылар бүгүн, ол эбэтэр ыам ыйын 6 күнүгэр «Полярние авиалинии» хампаанньа бөртөлүөтүн көтүттүлэр.
Көрдүүр бөлөх састаабыгар ИДьМ үлэһитэ, ЫБМК бэрэстэбиитэлэ уонна десантник-быыһааччылар киирбиттэрэ. Кинилэр Орто Халыма улууһа Дьааҥы улууһун кытары быысаһар кыраныыссатыттан икки көстөөх сиргэ быраҕыллыбыт «УАЗ» массыынаны булбуттара. Итиэннэ иккис массыына суолун батыһа көтөннөр, 3,5 көстөөх сиртэн сарсыарда 11 чаас 30 мүнүүтэҕэ «ГАЗ-66» массыынаны уонна дьону буллулар.
Алексей Тарасов иһитиннэрэринэн, быыһаммыт алта киһи бары этэҥҥэлэр, ыалдьыбыт, эчэйбит суох. Быыһааччылар алдьаммыт массыыналары хаалларан бараннар, дьону Орто Халыма куоракка аҕаллылар диэн Ил Дархан уонна бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru