«Таас-Үрэх Нефтегазодобыча» ХЭУо Саха Өрөспүүбүлүкэтигэр 11 лиссиэнсийэлээх учаастактаах. Мантан тоҕуһугар оператор быһыытынан, оттон бэйэтэ Киин блокка уонна Куруҥнааҕы лиссиэнсийэлээх учаастакка Орто Ботуобуйатааҕы сиргэ үлэлиир. Орто Ботуобуйатааҕы учаастак Мииринэйтэн соҕуруулуу-арҕаа хайысханан 130 килэмиэтир тэйиччи, оттон Ленскэйтэн хотугулуу-арҕаа хайысханан 140 килэмиэтир тэйиччи сиргэ сытар. Хостоммут ньиэп «Илин Сибиир – Тиихэй акыйаан» турбатынан тиэрдиллэр.
Орто Ботуобуйатааҕы ньиэп, гаас конденсата хостонор сиригэр былырыыҥҥыттан үлэлии турар газотурбиннай электростанция (ЭСН-2) гааска көһөрүлүннэ. Бу туһунан «Таас-Үрэх Нефтегазодобыча» хампаанньа пресс-сулууспата иһитиннэрдэ.
«Таас-Үрэх Нефтегазодобыча» ХЭУо үлэлиир Орто Ботуобуйатааҕы ньиэп-гаас конденсаттаах сирэ Илин Сибииргэ саамай улахан уонна кэскиллээх учаастагынан биллэр. Манна сыллата ньиэби хостооһун кээмэйэ улаата турарынан, лиссиэнсийэлээх хампаанньа уотун-күөһүн, суолун-ииһин оҥорууга бары күүһүн уурар. Хостооһун, тиэйии-таһыы үлэтигэр улахан кыамталаах электростанция үлэтэ ирдэнэр буолан, 2015 сыллаахха ахсынньыга Орто Ботуобуйаны электричество уотунан хааччыйар сыалтан, ыстаансыйаны тутар туһунан быһаарыы ылыммыттара.
– Электростанцияҕа 5,052 МВт кыамталаах гаас турбинатын уон агрегата туруоруллубута. Бу уопсай кыамтата 50,52 МВт тэҥнэһэр, – диэн «Строительство площадочных объектов» бырайыак салайааччытын солбуйааччы Максим Зубанов иһитиннэрдэ.
Бу агрегаттар Siemens SGT-A05 турбиналар баазаларыгар оҥоһуллубуттар. «Турбиналар Хотугу муораҕа, Арҕаа Африкаҕа, Сибииргэ, Бразилияҕа, Аляскаҕа, Соҕуруулуу-Илин Азияҕа тургутууну ааспыт буоланнар, тыйыс усулуобуйаҕа үлэлиир кыахтаахтарын толору дакаастаабыттара», – диэн Максим Зубанов эбэн эттэ.
Орто Ботуобуйаҕа хампаанньа бэйэтин газотурбиннай ыстаансыйатын тутуу бырайыагынан түөрт аҥаар сыл үлэлээбитин таһынан, аны тутуу-таҥыы үлэлэригэр икки сыл кэриҥэ бириэмэни ыыппыт.
Тутууну үлэҕэ киллэрии икки түһүмэҕинэн ыытыллыбыт. Ол курдук, былырыын кулун тутарга тоҕус гаас турбинатын агрегаттарын айылҕа гааһынан үлэлэппиттэр. Оттон от ыйыгар өссө эбии биир агрегаты үлэҕэ киллэрбиттэр.
Билигин гаас турбинатын станциятын нефтяной гааска (попутный нефтяной газ (ПНГ) көһөрдүлэр. Бу ыстаансыйа үлэтигэр быдан табыгастаах буолуо диэн исписэлиистэр этэллэр.
edersaas.ru