Бүгүҥҥү туругунан, өрөспүүбүлүкэ орто үөрэхтэригэр барыта 19 430 сайабылыанньа киирдэ (9-с кылаас кэнниттэн — 6 643, 11-с кылаас кэнниттэн — 12 787).
СӨ Бырабыыталыстыбатын 2022 сыл кулун тутар 22 күнүнээҕи 238-с нүөмэрдээх дьаһалыгар олоҕуран, СӨ бүддьүөтүттэн 2022-2023 үөрэх дьылыгар 6 422 миэстэ көрүллүбүтэ. Ол иһигэр 11-с кылаас кэнниттэн — 2 971, 9-с кылаас кэнниттэн — 3 351 миэстэ.
Дьокуускайдааҕы мэдиссиинэ кэллиэһигэр 2 773, И.И.Фадеев аатынан үп-экэниэмикэ кэллиэһигэр 1 896, С.Ф.Гоголев аатынан Дьокуускайдааҕы педагогическай кэллиэскэ 1 766 сайабылыанньаны биэрдилэр.
Ордук улахан куонкурус И.И.Фадеев аатынан үп-экэниэмикэ кэллиэһигэр – 1 миэстэҕэ 12 киһи (155 миэстэ, 1896 сайабылыанньа). Дьокуускайдааҕы педагогическай кэллиэскэ — 1 миэстэҕэ 8 киһи (210 миэстэ, 1766 сайабылыанньа), П.И.Дудкин аатынан Дьокуускайдааҕы сибээс уонна энергиэтикэ кэллиэһигэр – 1 миэстэҕэ 8 киһи (195 миэстэ, 1639 сайабылыанньа).
Куонкуруһунан ордук ирдэнэр исписээлинэстэринэн буолаллар:
— 9-с кылаас кэнниттэн: информационнай систиэмэ уонна программирование – 369, оскуола иннинээҕи үөрэхтээһин – 242, экэниэмикэ уонна бухгалтерскай учуот (салааларынан) – 223, дизайн (салааларынан) – 209, асчыт, кондитер – 203.
— 11-с кылаас кэнниттэн: сиэстэрэ дьыалата – 1219, эмчит дьыалата – 805, алын кылаас учуутала – 502, лабораторнай диагностика – 498, информационнай систиэмэ уонна программирование – 445, банковскай дьыала – 438.
Куонкурус 14 анал үөрэх тэрилтэтигэр суох – Алданнааҕы политиэхиньиическэй тиэхиньукумҥа, эрэгийиэннээҕи тиэхиньиическэй кэллиэскэ (Мииринэй), Арктикатааҕы хотугу норуоттар кэллиэстэригэр, Үөһээ Бүлүүтээҕи тиэхиньикумҥа, Ленскэйдээҕи технологическай тиэхиньикумҥа, Намнааҕы тиэхиньикумҥа, Чурапчытааҕы аграрнай-тиэхиньиическэй кэллиэскэ, олох аҕыйах сайабылыанньа Ньурба тиэхиньикумугар, Сангардааҕы элбэх хайысхалаах лиссиэйгэ, Сунтаардааҕы технологическай кэллиэскэ, Уус Алданнааҕы тиэхиньикумҥа, Н.Е.Мординов-Амма Аччыгыйын аатынан Харбалаахтааҕы үөрэх комплексыгар, “Арктика” оробуочай каадырдарга бэлэмниир кииҥҥэ.
Өрөспүүбүлүкэтээҕи киин тутар хамыыһыйа П.И.Дудкин аатынан Дьокуускайдааҕы сибээс уонна энергиэтикэ кэллиэһигэр (П.Алексеев уул., 25) атырдьах ыйын 20 күнүгэр диэри үлэлиир.
Киин тутар хамыыһыйаҕа 13 орто анал үөрэх тэрилтэтин бэрэстэбиитэлэ баар: Алданнааҕы политиэхиньиическэй тиэхиньикум, Үөһээ Бүлүүтээҕи тиэхиньикум, Н.Г.Чернышевскай аатынан Бүлүүтээҕи профессиональнай-педагогическай кэллиэс, Хайа геологическай тиэхиньикума, Ньурба тиэхиньикума, Өлүөхүмэ тиэхиньикума, Сунтаардааҕы технологическай кэллиэс, Р.И.Брызгалов аатынан Тырааныспар тиэхиньикума, Уус Алданнааҕы тиэхиньикум, Н.Е.Мординов-Амма Аччыгыйын аатынан Харбалаахтааҕы үөрэх комплекса, “Арктика” оробуочай идэлэргэ бэлэмниир киин, Дьокуускайдааҕы автодорожнай тиэхиньикум, Дьокуускайдааҕы тыа хаһаайыстыбатын тиэхиньикума.