“Биһиги орто анал үөрэх хаачыстыбатын уонна таһымын көннөрү үрдэтии эрэ соругун туруорбаппыт, философиятын толору уларытарга этэбит” – диэн Ил Дархан бэҕэһээ Ил Түмэҥҥэ Анал этиитин кэмигэр бэлиэтээтэ. Ол аата тугуй?
Орто анал үөрэх систиэмэтин уларыта тутуу кэм ирдэбилэ буоларын ыйар. “Экэниэмикэ бүгүҥҥү ирдэбилинэн оробуочай идэлэри бэлэмнээһини хааччахтыыр сатаммат. Кыра хамнастаах үлэҕэ үлэлиир исписэлиистэри бэлэмнээһин – ыччаппыт олоххо ситиһиитин сарбыйыы” – диэн эттэ. Онон үөрэх бу салаатыгар уларытыы барара наадатын ыйда.
Маныаха уларытыыны Кангаласс бөһүөлэгэр Суперкампус үөрэтэр-производственнай кластеры тутууттан саҕалыахтарын иһитиннэрдэ.
Манна үрдүк технологиялаах салааларга ситиһиилээхтик үлэлиир инженернэй компетенциялардаах саамай ирдэнэр исписэлиистэри бэлэмниир аныгы инфраструктура тэриллиэҕэ диэтэ.
Итиэннэ Суперкампус Туймаада бары хочотун сайыннарар күүһүнэн буоларыгар эрэллээҕин эттэ. Онтон билигин “Якутия” ТОР бырайыактара сайдар Кангаласс, норуоттар икки ардыларынааҕы таһымнаах компетенциялар идэлэрин киинин быһыытынан салгыы сайдыаҕа диэтэ.
Людмила ПОПОВА, “Саха сирэ” хаһыат, edersaas.ru
Хаартыска: Мария ВАСИЛЬЕВА (СИА).