Мэҥэ Хаҥалас улууһун Ороссолуода нэһилиэгин олохтоохторо сэлиэнньэ биир киин уулуссатын СӨ иккис бэрэсидьиэнэ Вячеслав Штыров аатынан ааттыырга быһаардылар.
2009 сыллаахха сыллата ууга барар сэлиэнньэни үрдүк сиргэ көһөрөргө быһаарбыттара. Ол эргэ сэлиэнньэттэн көһөн кэлбит олохтоохтор саҥа уулуссаларын бэрэсидьиэн аатынан ааттаатылар.
Вячеслав Анатольевич аан бастаан саҥа сиргэ оскуоланы тутарга сорудахтаабыта. Онтон саҕаланан, эбии хочуолунай, носуостуур ыстаансыйа, оҕо саада, киин ититиилээх олорор дьиэлэр тутуллубуттара, уулуссалар оҥоһуллубуттара.
Вячеслав Штыров аатынан уулусса аһыллыытыгар улуус дьаһалтата уонна олохтоохтор бары муһуннулар. Алгыс кэнниттэн уулусса аатын кэпсиир стендэни үөрүүлээх быһыыга-майгыга арыйдылар.
СӨ судаарыстыбаннай сүбэһитэ В.А. Штыров оҕо саадыгар интерактивнай, кумахтаах оонньуур сири, олохтоох бибилэтиэкэҕэ саҥа кинигэлэри бэлэх гынан ыыппыт диэн СИА суруйар.
Ангелина Васильева, «Саха сирэ» хаһыат, edersaas.ru
Хаартыска: СИА.