Дойду бэрэсидьиэнэ Владимир Путин коронавирус ыксаллаах балаһыанньатынан сибээстээн, муус устар 15 күнүгэр «Арассыыйа-24» ханаалга бырабыыталыстыба чилиэннэрин кытары видео-сибээһи аан бастаан ыытта.
edersaas.ru
Дойду баһылыга авиахампаанньаларга 23 миллиард солкуобайы көмө быһыытынан биэрэргэ этии киллэрдэ.
Бу үп тиэхиньикэ лизинигэр, эргитэр үбү элбэтиигэ, үлэһиттэргэ хамнаһы уонна салгын судноларын турар сирдэрин иһин төлөбүрдэргэ бэриллиэхтээх.
Кулун тутар 27 күнүттэн атын дойдуларга күн аайы уонна чартернай рейс быһыытынан көтүүлэр толору тохтотуллубуттара. Атын дойдулартан Арассыыйа олохтоохторун аҕалар эрэ көтүүлэр оҥоһуллаллар.
Арассыыйа иһигэр көтүүлэр эмиэ биллэ кыччаатылар. Муус устар 14 күнүгэр биллибитинэн, «Аэрофлот» муус устар саҥатыттан дойду иһигэр көтүүлэри икки төгүлүн аҕыйатта. Ол эбэтэр саамай элбэхтик көтөр Москва, Сочи, Екатеринбург, Санкт-Петербург, Краснодар маршруттарынан көтүүлэр аҕыйаатылар.
Надежда ЕГОРОВА, “Саха сирэ”, edersaas.ru