Доруобуйа Сүрүн

Оройуоннар балыыһаларыгар уон саҥа массыына кэллэ

Оройуоннар балыыһаларыгар уон саҥа массыына кэллэ.

Ыраах нэһилиэнньэлээх пууннарга мэдиссиинэ үлэһиттэрин, ыарыһахтары, эми-тому, анаалыстары таһарга уон саҥа көлө кэллэ. «УАЗ» массыыналар «Доруобуйа» национальнай бырайыагынан доруобуйа харыстабылын бастакы сүһүөх звенотун саҥатытан оҥоруу бырагырааматын иитинэн ылылыннылар.

«Тиэхиньикэлэр сэлиэнньэлэргэ, бөһүөлэктэргэ уонна кыра куораттарга үлэлииргэ ананаллар. Маннык гынан, биһиги уустук суоллаах-иистээх нэһилиэнньэлээх пууннарга мэдиссиинэ көмөтө кыаллымтыа буоларын ситиһэргэ дьулуһабыт. Бу кэлбит уон көлө барыта өрөспүүбүлүкэ улуустарыгар ыытыллар«, — диэн этэр Ил Дархан Айсен Николаев.

Массыыналар Томпоҕо Теплай ключ, Булуҥҥа Күһүүр амбулаториятыгар, Мэҥэ Хаҥалас улууһугар Хаптаҕайга, Сунтаарга Кутанаҕа, Үөһээ Бүлүү улууһугар Далырга дьоҕус поликлиникаҕа, Ньурба оройуонугар Маалыкай амбулаториятыгар, Мииринэйгэ Чернышевскай балыыһатыгар, Хаҥалас улууһугар Мохсоҕоллооххо оҕо поликлиникатыгар, Амма уонна Өлүөхүмэ оройуоннааҕы киин балыыһаларын поликлиникаларыгар бэриллибиттэрэ.

Санатар буоллахха, Ил Дархан Айсен Николаев бэс ыйыгар оройуоннааҕы киин балыыһалар кылаабынай быраастарыгар  суһал көмөҕө уонна паллиативнай көмө сулууспаларыгар бастакы баартыйанан кэлбит 25 көлө күлүүһүн туттарбыта. Бэлиэтээн эттэххэ, доруобуйа харыстабылын бастакы сүһүөх звенотун саҥатытыы бырагырааматынан, көлөлөр уонна мэдиссиинэ тэриллэрэ эрэ уларыйбаттар, өссө доруобуйа харыстабылын эбийиэктэрэ тутуллаллар уонна өрөмүөннэнэллэр, ол иһигэр улуустарга балыыһа улахан комплекстара киирэллэр.

Доруобуйа харыстабылын бастакы сүһүөх звенотун саҥатытыы бырагыраамата өрөспүүбүлүкэҕэ былырыын саҕаламмыта. Өрөспүүбүлүкэ салалтата урут хаһан да буола илик үбүлээһини, 6,6 млрд.солк. бырагыраамаҕа көрдөрөрү ситиспитэ. Бу харчыга улуус кииннэригэр балыыһа улахан комплекстара тутуллаллар, мэдиссиинэ үрдүк технологиялаах тэриллэрэ уонна оройуон киин балыыһаларыгар көлөлөр ылыллаллар. Быйыл Саха сирин мэдиссиинэҕэ тэрилтэлэригэр 53 көлөнү ылар былааннанар.

 

Хаартыскаларга Иван Борисов түһэриилэрэ

0
0
Telegram Whatsapp