Биэдэмистибэлэр икки ардыларынааҕы суһал бөлөх Дьааҥыга ардахтан халаан буолуоҕуттан үлэлиир.
Бөлөҕү СӨ нэһилиэнньэ олоҕун-дьаһаҕын хааччыйыыга судаарыстыбаннай кэмитиэт бэрэссэдээтэлин э.т. Иннокентий Андросов салайар. Бу туһунан тустаах тэрилтэ пресс-сулууспата иһитиннэрэр.
Баатаҕай бөһүөлэгэр, уу муҥутуур кутталлаах таһыма бэлиэтэнэр сиригэр, нэһилиэнньэлээх пууну ардах халааныттан көмүскүүргэ үлэ күүһүрдүллүбүт. Суолга бөҕөргөтүү үлэтэ ыытыллыбыт. Быыһыыр сулууспа, дьаһалта үлэһиттэрэ уонна олохтоохтор Баатаҕай нефтебазатын уу ылбатын курдук оҥорбуттар, быыһааччылар бөһүөлэккэ дьуһуурунайдаабыттар. Суолу үрдэтии уонна кумахтаах мөһөөччүктэри таһан кыстаабыттара оройуон киинигэр уу киирэрин тохтоппут.
Ардах халааныттан эмсэҕэлээбит сэлиэнньэлэргэ быһааччылар бөлөхтөрө дьону-сэргэни көһөрөргө, малларын-салларын, миэбэллэрин үөһээ таһаарарга, үрдүк сиргэ уурарга көмөлөһөллөр. Күн ахсын оҕолору, кырдьаҕастары Дьокуускай куоракка ыытыы салҕанар. СӨ быыһыыр сулууспатын уонна РФ ыксаллаах быһыыга-майгыга министиэристибэтин управлениетын үлэһиттэрэ салгын аалынан тиэрдиллибит гуманитарнай көмөнү таһыыга, дьоҕус суудуналарынан иһэр ууну, аһы-үөлү, эми-тому нэһилиэнньэҕэ тиэрдиигэ көмөлөһөллөр.
Мэдиссиинэ көмөтүгэр наадыйар дьоҥҥо быраастары уонна оройуон олохтоохторугар биэнсийэлэрин тиэрдэр үлэһити илдьэн биэрии тэриллибит.
Дулҕалаахха, Боруулаахха, Адыаччыга уу таһыма намтыыр. Чугастааҕы күннэргэ уу таһыма Бөтөҥкөскө намтыа. Боронукка уонна Верхоянскайга чугастааҕы күннэргэ уу сыыйа түһүө.