Дьокуускайга Саха сирин норуоттарын муусукатын уонна фольклорун мусуойугар Ороһуоспа бырааһынньыктарынан болҕомтону тардар тэрээһин саҕаланна. Бу туһунан биһиэхэ мусуой наукаҕа үлэһитэ Мария Корнилова иһитиннэрдэ.
— «Ороһуоспа уота» уонна Таҥха» тэрээһиннэр тохсунньу 13 күнүттэн тохсунньу 19 күнүгэр диэри ыытыллаллар. «Ороһуоспа уота» тэрээһиҥҥэ Саха АССР үтүөлээх, норуодунай артыыһа, Былатыан Ойуунускай аатынан Судаарыстыбаннай бириэмийэ лауреата, Мэҥэ Хаҥалас улууһун, Дьокуускай куорат уонна Саха Өрөспүүбүлүкэтин бочуоттаах гражданина, норуот тапталын ылбыт ырыаһыт Марина Константиновна Попова—Эдьиий Марыына муспут бэспиэнньиктэрэ (чүмэчи олоҕо) быыстапкаҕа туруорулуннулар. Бииргэ үлэлээбит, алтыспыт доҕотторо кэпсээбиттэринэн, Марина Константиновна кэллиэксийэтин 90-с сыллартан саҕалаабыт. Кини чүмэчи олохторун мунньуунан үлүһүйэрин билэр буоланнар, доҕотторо ханна сырыттылар да, кырасыабай, ураты бэспиэнньиктэри кэһиилэнэн кэлэллэр эбит. Кини бу муспут баайын-дуолун, сувенирдарын, хаартыскаларын, ыллыырыгар кэппит былаачыйаларын, пианинотын аймаҕа Евдокия Васильевна Давыдова 2016 сыллаахха биһиги мусуойбут пуондатыгар бар дьоҥҥо көрдөрөрбүтүгэр анаан туттарбыта.
Маны сэргэ, «Таҥха» киэһэтэ дьону-сэргэни түмэр. Быйылгы тэрээһиммитигэр Евдокия Филиппова, Валерия Моржова, Анжелика Васильева -Удаҕайаана, Дойдууна, Егор Винокуров, Аайра Петрова, Аделаида, Байаана кыттыыны ылаллар. Сэҥээрбиттэр, сэргээбиттэр кэлэн сылдьалларыгар, айылҕаттан айдарыылаахтары кытары көрсөн санааларын үллэстэллэригэр, ыйытыыларыгар хоруйдары, сүбэни-аманы ылалларыгар ыҥырабыт, — диэн кэпсээтэ.
Сардаана БАСНАЕВА, «Саха сирэ» хаһыат, edersaas.ru