Бүгүн күнүс, 3 чаастан, Орджоникидзе болуоссатыгар тэриллибит миитиҥҥэ аармыйаҕа барар уолаттары атаардылар уонна бэтэрээннэри, куорат олохтоохторун саллаат хааһытынан күндүлээтилэр.
edersaas.ru
Болуоссакка тэриллэр миитиҥҥэ хонуутааҕы куукунаны тардыы үтүө үгэскэ кубулуйда. Саната таарыйа эттэххэ, бу дьаһал аан-бастаан А.С.Пушкин аатынан Нуучча тыйаатырын иннигэр тэриллэрэ, онтон кэлиҥҥи сылларга киэҥ сиргэ, Орджоникидзе болуоссатыгар, ыытыллар.
Үөрүүлээх миитини арыйарыгар Ил Түмэн Бэрэссэдээтэлин солбуйааччы, «Арассыыйа Федерациятын хомуньуус баартыйата» политическай баартыйа Саха сиринээҕи салаатын салайааччы Виктор Губарев мустубут бар дьону Улуу Кыайыы күнүнэн эҕэрдэлээтэ, төһөнөн сыл-хонук ааһар даҕаны соччонон бу Кыайыы суолтата күүһүрэн иһэр диэтэ итиэннэ тыыл бэтэрээнигэр, ыччаты патриотическай иитиигэ олоҕун анаабыт Иван Мохначевскайга Ил Түмэн Бэрэссэдээтэлин Махтал суругун туттарда.
Дьокуускай куорат Дууматын бэрэссэдээтэлэ Альберт Семенов күн бүгүн киин куоракка 63 сэрии бэтэрээнэ, 22 Ленинград блокадатын кыттыылааҕа итиэннэ тыылга кыайыыны уһансыбыт 1950 тыыл бэтэрээн баарын бэлиэтээн туран, бүгүҥҥү иллээх олохпут туһугар кинилэргэ махтанабыт, сүгүрүйэбит, кинилэр тустарыгар кыһамньыбыт уостубат диэтэ.
Аармыйаҕа барар эдэр дьону атаарыы сиэрэ-туома долгутулаах буолла. Диктор эрчимнээх куолаһынан биллэрэрин кытары өрөгөйдөөх байыаннай муусука тыаһыгар доҕуһуоллатан, сүүрбэ эдэр уол чиҥник үктээннэр, тырыбына иннигэр турунан кэбистилэр. Ийэ дойду иннигэр ытык иэстэрин төлүү баран эрэр эдэр дьон ааттарыттан Павел Казаков чиэстээхтик сулууспалыахпыт, аҕа көлүөнэбит үтүө аатын түһэн биэриэхпит суоҕа диэтэ.
Өртөн олохсуйбут үтүө үгэс быһыытынан, эдэр волонтердар бэтэрээннэри уонна бары мустубут дьону саллаат хааһытынан, бутербродунан, сылаас чэйинэн итиэннэ дьоҥҥо-норуокка «наркомовскай 100 грамм» дэммит утаҕынан күндүлээтилэр.
Миитини “Сынньалаҥҥа” диэн култуурунай бырагыраама салҕаата. Куорат култуурунай холбоһуктарын үҥкүүһүттэрэ 74 пааранан вальска эргичийдилэр. Манна эдэркээн уоллаах кыыстан саҕалаан, кырымахтыйбыт баттахтаах ытык саастаах үҥкүүһүттэр эмиэ баар эбиттэр.
Болуоссат икки эҥээринэн байыаннай тиэхиньикэ быыстапка тардыллыбытгар оҕо аймах хаартыскаҕа түһэн күннээтэ.
– Кыайыы күнэ мин биир саамай долгуйа кэтэһэр бырааһынньыгым буолар, – диир куорат олохтооҕо, үлэ бэтэрээнэ Мария Саввина. – Бу күн Аҕа дойдуну көмүскүүр Улуу сэриигэ олоҕун толук уурбут таайбын уонна 1942-1944 сс. Чурапчы көһөрүллүүтүгэр Булуҥ оройуонугар көһөрүллэн, фронт туһатыгар балыктаабыт, эрэйи эҥээринэн тэлбит холкуостаах ийэбин ахтан-санаан кэлэбин, кинилэр тустарынан урут оҕолорбор кэпсиирим, билигин сиэттэрбэр сэһэргиибин.
Раиса Сибирякова, «Саха сирэ» edersaas.ru
Хаартыскаҕа Мария Васильева (ЯСИА) уонна Петр Оконешников түһэриилэрэ.