Ординатордар көҥүл өттүнэн  Мииринэй оройуонун быраастарыгар көмөлөстүлэр

Бөлөххө киир:

“АЛРОСА” хампаанньа ыҥырыытынан, Дьокуускайдааҕы мэдиссиинэ кэллиэһин уонна М.К. Аммосов аатынан ХИФУ мединститутун ординатордара Мииринэй оройуонугар үлэлээн кэллилэр. Кинилэр аан дойдуну атыйахтаах уу курдук аймаабыт хоруона хамсыгын утары охсуһууга көҥүл өттүнэн биир бастакынан кыттарга быһаарыммыттара кэрэхсэбиллээх.

edersaas.ru

Бастакы уопут

 —  Ординатордар бөлөхтөрө Мииринэй оройуонугар кулун тутар ый бүтүүтүгэр көппүттэрэ. Кинилэр истэригэр хирурдар, офтальмологтар, инфекционистар, онкологтар, травматологтар, быраас уопсай быраактыкатын исписэлиистэрэ киирбиттэрэ. Бу оҕолор “АЛРОСА” АХ (ПАО) ыҥырыытынан, быраас көмөлөһөөччүтүн быһыытынан производственнай быраактыканы аастылар, — диэн, биһиэхэ  ХИФУ Мединститутун ординатураҕа уонна аспирантураҕа отделын наачаалынньыга Айталина Максимова кэпсээтэ.

Салгыы ординатордар быраактыкаларын салайбыт Марат Вазиев санаатын истиэҕиҥ:

— Биһиэхэ 70-ча устудьуон үлэлээн барда. Кинилэри Мииринэйгэ, Айхалгатарҕатан үлэлэппиппит. Оҕолор улуус тэрилтэлэригэр үлэһиттэр тэмпэрэтиирэлэрин хонтуруоллаан, сөмөлүөттэри көрсөн, ким эрэ обсерваторга үлэлээн, анаалыс ылан, быһата, араас хабааннаах үлэни толорон, биһиги быраастарбытын кытта тэҥҥэ үтүмэн үлэни оҥордулар. Биллэн турар, хас биирдиилэригэр настаабынньык сыһыарыллыбыта, маннааҕы исписэлиистэр салайыыларыгар үлэлээн бардылар. Санаабыт иһинэн үлэлээн, көмөлөһөн бардылар, биһирээтибит!

Марат Михайлович этэринэн, бастаан утаа биир ый уһуннаах быраактыканы барарга дуогабар түһэрсиллибит, ол гынан баран, устудьуоннар бэйэлэрин баҕаларынан, быраактыкаларын уһаттаран, өссө икки ый хаалан үлэлээбиттэр.

Ол курдук, сорох биэлсэрдэр уонна ординатор быраастар иккилии-үстүү ый үлэлээн кэлбиттэр.

Эдэр  эмчиттэр оройуон балыыһаларыгар, “АЛРОСА” хампаанньа Мэдиссиинэтин киинигэр, аэропуорка уонна рудниктарга баар здравпууннарга үлэлээбиттэр. Бу туһунан Марат Михайлович:

— Ротация оҕолор баҕаларынан ыытыллыбыта. Ол быһыытынан, сорохтор биһиги бары былаһааккаларбытын көрөр кыахтаммыттара, үлэ араас усулуобуйатын, кэлэктииптэри кытта билистилэр, бэйэлэрин идэлэригэр бэриниилээхтэрин көрдөрдүлэр, туруоруллубут соруктары олоччу толордулар диэххэ наада.

Олохтоох быраастар эмиэ ыччаты кытта үлэлиири олус сөбүлээбиттэр. Устудьуоннар бары да креативнайдарын, түргэн-тарҕан туттунуулаахтарын, үөрэтиини кэбэҕэстик ылыналларын, этэргэ дылы, барытын ааһан иһэн судургутук өйдөөбүт, быһаарсыбыт буолалларын анаан бэлиэтииллэр.

Быраактыканы салайбыт Марат Михайлович:

— Эдэр, устудьуон сылларбын, кинилэр саастарыгар бэйэбит хайдах эбиппитин бу баардыы өйдөөн кэллибит, — диэн, күлэр. – Биһиги кинилэр үөрэх кыһатыгар ылбыт билиилэриттэн, үөрүйэхтэриттэн астынныбыт. Бу биһиэхэ устудьуоннары кытта үлэ аан бастакы уопута буолар. Эһиил араас барыйааннары үөрэтэн көрүөхпүт, холобур, уоппускаҕа барар быраастары кинилэринэн солбуйтарарбыт тоҕо кыаллыбат буолуой?

Бу биһиги ытык иэспит”

Майя Дмитриева – ХИФУ Мэдиссиинэҕэ институтун “Клиническая рентгенология” идэтигэр бастакы сылын ординатордыыр. Сүүмэрдээһин ыытылларын истээт да, кини Мииринэйгэ үлэлии барар баҕалааҕын тута биллэрбит:

— Бастаан Иркутскайдааҕы судаарыстыбаннай университеты бүтэрбитим, ол кэнниттэн ординатурабын ХИФУ институтугар салгыырга быһаарыммытым. Мииринэйгэ үс ый буоллум. Бастаан – хампаанньа Медкиинигэр рентгент кэбиниэтигэр, салгыы былааннаммыт уонна суһаллык ыытыллар медосмотр ыытыллар буолбут “Горняк” профилакторийга үлэлээбитим. Биир нэдиэлэ – “Мир” рудникка, быраастар үлэһиттэргэ симиэнэ иннинээҕи уонна кэннинээҕи термометрияны ыыталларыгар көмөлөспүтүм. Онтон аны аэропорка тиийэн, “Роспотребнадзор” үлэһиттэрин кытта сөмөлүөттэри көрсөрбүт. Онуоха хас бэнидиэнньик аайы 4-5 эриэйис баар буолара, уоннааҕы күннэргэ – иккилии-үстүү. Биһиги сөмөлүөтүнэн көтөн кэлэр дьоннорго икки нэдиэлэ устата хааччахтаах (самоизоляция) эрэсиимҥэ олоруохтаахтарын туһунан ыйыы туттарарбыт, оттон тэмпэртиирэлээхтэр баар түгэннэригэр кинилэри обсерваторга ыыталыырбыт.  Биллэн турар, бастаан утаа сыстыахпыт диэн, хайдах эрэ сэрэхэдийэр этибит. Ол гынан баран, эмчит идэтин талбыт дьон буоларбытынан, биһиги маннык түгэҥҥэ инники күөҥҥэ сылдьыахтаахпыт өйдөнөр буоллаҕа.

Ити курдук хас да сиринэн үлэлээн баран, Майя дьиэтигэр от ыйын 1 күнүгэр төннүбүт. Манна икки нэдиэлэ изоляцияланан баран, Бүлүүгэ баар төрөппүттэригэр барарга былааннанар. Кини Мииринэйи олус диэн сөбүлээбитин этэр, ол гынан баран, анааһын быһыытынан, Өлүөхүмэ улууһугар үлэлии барыахтаах эбит.

— Биһигини кытта үлэлэспит быраастарбыт үтүөкэн дьон. Быраактыкабытын салайбыт кураторбар Татьяна Жансарановнаҕа уонна Марат Михайловичка биһиэхэ истиҥ сыһыаннарын, көмөлөрүн, сүбэлэрин уонна биһиги туспутугар кыһамньыларын иһин махтанабын, — диир Майя.

Дьокуускайдааҕы медколледж устудьуоннара эмиэ хаалсыбаттар

Элбэх үрүҥ халааттаах аанньалы иитэн-такайан таһаарбыт Дьокуускайдааҕы медиссиинискэй кэллиэс да бу хамсыгы утары үлэттэн туора турбата.

— “Биһиги “Лечебное дело” салаабытыгар үөрэнэр төрдүс куурус устудьуоннара, ону тэҥэ “Лабораторная диагностика” салаатын үһүс кууруһун устудьуоннара быраактыкаларын үс ый устата Мииринэй оройуонугар бардылар.  Уопсайа бу производственнай быраактыкаҕа 35 устудьуон сылдьыбытыттан “Лечебное дело” отделениеҕа үөрэнэр, биэлсэр идэтин баһылыахтааҕа – 33. Оттон икки устудьуон – “Лабораторнай диагностикаттан”. Кинилэр Айхалга, Удачнайга уонна Мииринэйгэ үлэлээтилэр. Биһиги үөрэхпит кыһатын бүтэрэр устудьуоннарбыт бары сокуоннай саастарын туолбуттарын да иһин, кинилэр төрөппүттэриттэн көҥүл ылбыппыт. Быраактыкаламмыт устудьуоннар бары Мииринэйгэ көҥүл өттүнэн, күһэйиитэ суох баран үлэлээн кэллилэр, — диэн тустаах үөрэх кыһатын “Лечебное дело” отделениетын сэбиэдиссэйэ Галина Корнева кэпсээтэ.

Дьокуускайдааҕы Мэдиссиинэ кэллиэһин бүтэрэн, биэлсэр дьупулуомун ылбыт Ньургун Игнатьев төһө да аймахтарыгар биир да эмчит идэлээх суоҕун иһин, оҕо эрдэҕиттэн быраас буоларын ыралыыра. Оҕо сылдьан, үгүстүк ыарытыйар эбит, онон кини туругун чэпчэтэр үрүҥ халааттаах эмчиттэри уолчаан аанньал тэҥэ ылына, көрө улааппыт. Ньургун кинилэртэн биирдэстэрэ буолуоҕун баҕарара үһү.

— Кэлээппитин кытта биһигини Удачнайга анаабыттара. Онно здравпууҥҥа үлэлээн, баахта үлэһиттэригэр медосмотр ыытар этибит. Ол кэнниттэн “Удачнай” рудникка ыыппыттара, онно быраастары кытта медосмотр ыытарбыт, үнүстүрүмүөннэри дезинфекциялыырбыт. Бэртээхэй быраактыка буолла! Элбэх саҥаны биллибит. Симиэнэнэн үлэлиир этибит: сарсыарда 5 чаастан эбиэккэ дылы, эбиэт кэнниттэн киэһэ 8 ч диэри. Сылайар этибит, онон дьиэҕэ сынньанарбыт. Удачнай – чөкө, уурбут-туппут курдук, араас өҥнөөх кырааскалардаах дьиэлэрдээх интэриэһинэй куорат, — диир Ньургун. — Мииринэй быраастара олус компетентнайдар, идэлэригэр дьиҥ профессионал дьон. Биһигини аймах, чугас дьоннорун курдук сылаастык көрсүбүттэрэ, барытыгар көмөлөһөллөрө. Үс ый тухары кинилэри кытта доҕордостубут. “АЛРОСА” хампаанньаҕа өрөспүүбүлүкэ биир бэлиэ сирин көрөр, бэйэбит наадалаах эбиппитин өйдүүр кыаҕы биэрбитин, астык быраактыка иһин махтанабын!

Манна даҕатан эттэххэ, Ньургун кэнэҕэһин Мииринэйгэ үлэлиир баҕалааҕын үллэһиннэ, оттон ол иннинэ ХИФУ Мединститутугар туттарсан, үөрэҕин салгыырга быһаарыммыт. Анаабыт курдук, бу кэпсэтэр күммүтүгэр кини докумуоннарын тустаах үөрэх кыһатыгар туттарбыт.

Бэлиэтиир буоллахха, баҕа өттүнэн эмчиттэргэ көмөлөһөр устудьуоннар кэлэр-барар айаннарын, олорор, аһыыр төлөбүрдэрин “АЛРОСА” хампаанньа олоччу бэйэтэ уйуммут. Ону таһынан хас биирдиилэригэр хамнас төлөөбүт. Дуогабар усулуобуйатынан, устудьуоннар Мииринэй, Айхал уонна Удачнай куораттар олохтоохторун эмтииргэ,  медосмотр ыытыыга көмөлөспүттэр.

Ити курдук, дуогабарга илии баттаспыт өрүттэргэ бу быраактыка олус туһалаах буолбут: быраас, эмчит буолуохтаахтар – бырамыысыланнас оҥорон таһаарыы усулуобуйатыгар ураты быраактыканы, үөрүйэҕи баран, уопутурбуттар, хамнастаммыттар, алмаас хампаанньата – бэйэтин үлэһиттэригэр мэдиссиинэ эбии көмөтө оҥоһулларыгар көмөлөспүт, оттон Мииринэй оройуонун, куоратын олохтоохторугар – эмчит тиийбэт кыһалҕата үөскээбэтэх, мэдиссиинэ каадырын өҥөтүнэн холкутук туһаммыттар.

«Саха сирэ», edersaas.ru сайтка анаан

Матрена КОНДРАТЬЕВА матырыйаалыттан тылбаас.

+1
0
+1
0
+1
0
+1
0
+1
0
+1
0
+1
0