Саҥа сыл үүнэрэ тарбахха баттанар күн хаалан, сорох дьон номнуо Саҥа дьыллааҕы бэлэхтэри тутан эрэллэр. Оттон 2018 сылтан Дьокуускай куорат олохтоохторо оптуобуһунан айанныылларыгар быйылгытааҕар 5 солкуобайынан элбэх харчыны төлүүр буолуохтара.
edersaas.ru
ЯСИА порталга Дьокуускай куорат баһылыга Айсен Николаев иһитиннэрбитинэн, тохсунньу ортотугар оптуобус төлөбүрэ үрдүөхтээх. «30 солкуобайга диэри үрдүөн сөп. Инникитин утарытынан (наличный расчет) төлөбүрү суох оҥорор былааннаахпыт. Оттон карточканан туһанааччыларга төлөбүр улаатыа суоҕа. Маны таһынан NFC технологиятынан туһанан смартфонунан кытары төлөбүрү ылар кыахтаныахтара», – диэн эбэн эппит.
Санатан эттэххэ, оптуобус төлөбүрэ былырыын ахсынньыга 25 солкуобайынан олохтоммута. Оттон карточканан төлөбүр маннааҕар төһө эмит кыра. Холобур, “Ультралайт” төлөбүр 40 айана – 18 солк. (каарта сыаната 720 солк.), 20 айан – 20 солк. (каарта сыаната 400 солк.) тэҥнэһэр.
Анивера АКИМОВА, edersaas.ru